首頁 arrow 綠色短評 arrow 馬英九攏是假e5!

馬英九攏是假e5! PDF 列印 E-mail
2008/07/22, Tuesday
馬英九競選總統進前,專工去中南部各所在toa3一工,講英文叫作「long stay」。chia住一暗、hia住一暝,咱台灣話叫作「搵豆油」,英文那會是「long stay」?原來是咱聽m7 tioh8,馬英九是講台語「攏是假e5」。 二月二四ti7「2008總統大選公民提問電視辯論」中,馬英九學韓國李明博所提e5「七四七」,伊提出「六三三」政見,講伊若當選總統,有法度hou7台灣經濟成長率到六葩、國民所得每人每年美金三萬箍、台灣失業率降到三葩。koh講伊e5「四六八方案」,一個四個人e5家庭,若是一年收入無到新台幣四十八萬,政府欲補貼四萬六千八百箍,伊若當選,每年欲編列二百五十億預算來實施chit個政策。提問人問講,政見若做be7到,是m7是欲捐出一半e5薪水hou7聯合勸募中心,馬英九應講無問題。   韓國李明博總統ti7舊年十二月當選,到今年二月二四滿一百工,才講伊e5「七四七」政見無法度達成,伊e5支持度落到chhun兩成外,伊向韓國人民會失禮,內閣總辭。馬英九比李明博koh khah厲害,當選了後猶未就任,就講「六三三」今年做be7到,奇怪e5是那會無聽伊講欲捐一半e5薪水出來?就任了後,伊e5支持度逐工落,到七月初七慶祝伊e5生日及就任五十工,馬英九e5支持度就落到三十葩,m7知到一百工會落到to2位去?   競選期間,馬英九用伊e5姓「馬」,講若hou7伊當選華語講是「馬上好」,chit 句口號ma7真sui2;講股票ui3一萬點開始起,馬英九當選了內定卻猶未就任e5經濟部長講台灣股票指數會到兩萬點,ma7真好聽。事實上五月二十總統就任,股票開始ui3九千二百九十五點,那像坐溜籠直直溜落去,到七月十六已經溜掉二千五百點、跋到六千七百十點,害一寡股民想講馬英九講「六三三」e5意思敢會是講股票會落到六千三百三?行政院長劉兆玄講「馬上好」e5意思是「馬上漸漸好」。害大多數e5台灣人聽一下「馬上hau2」。   汽油起價,帶動所有物資大起,台灣經濟土土土,台灣人直欲活be7落去ah!馬英九總統講這是國際局勢。但是人美國、新加坡、香港、馬來西亞、韓國、泰國除了採取退稅及補貼低收入戶以外,koh用各種辦法減少低中下層e5衝擊。民進黨黨團佇立法院提出「九十七年度退稅及補貼特別條例草案」,希望佇本會期通過救急。可惡e5中國國民黨講一寡有影無跡e5理由來阻擋。奇怪,那會按呢?補貼貧戶敢m7是馬英九總統競選時e5「四六八」政見? 按呢你就知影,馬英九e5話be7聽得。因為:馬英九攏是假e5!
 
< 前一個   下一個 >