首頁 arrow 綠色短評 arrow M7知「愛國」欲koh愛偌久?

M7知「愛國」欲koh愛偌久? PDF Print E-mail
Tuesday, 29 July 2008
七月二一,台北地方法院審理前海軍中將雷學明控告前總統陳水扁誹謗案,阿扁前總統佇台北地檢署門口,hou7一個「愛國同心會」「特勤組組長」蘇安生,ui3後壁ka7偷cham3一下,阿扁前總統向前chong5幾步、險險仔跋倒。轉去厝了後感覺真疼,去台大病院診斷講龍骨尾椎e5所在有小可tioh8傷。阿扁前總統講伊按怎hong5罵都無問題,那會使出跤動手拍人?所以決定欲ka7告。 有一寡頭殼碗te2糊仔e2立法委員及政論家講,阿扁前總統就是無照原本規畫佇台北地方法院大門口落車,家己改變路線佇台北地檢署大門口落車,才會hong5偷cham3一下。這那像一個查某人佇大路hong5搶錢,頭殼碗te2糊仔e5社會評論家,責備chit個查某人行路那會無愛行khah倚路中央?行傷過路邊才會hong5搶,in無問講是m7是台灣治安發生問題?一個查某人日時佇大路行路那會hong5搶錢?是按怎搶人e5歹徒有掠tioh8但是攏無代誌?是按怎仝一個歹徒會使一再搶人攏無代誌?   頂個月,前駐日代表許世楷轉來台灣欲報告釣魚台事件伊佇日本交涉e5經過,因為有一寡中國國民黨立法委員罵伊「台奸」,所以伊拒絕去立法院做作告。伊去拜訪阿扁前總統出來e5時,有一個「愛國同心會」成員看許代表欲上車進前,thiau故意欲用手骨long3許代表,Chit個人ma7是彼個蘇安生。   二00三年十一月初二暗時,當時參加群策會研討會toa3佇圓山飯店e5曹長青,有四個「愛國同心會」會員假作圓山飯店服務人員,請曹長青來櫃台講有訪客。he四個人指責曹長青身為中國人,無應該來台灣發表分裂國土e5言論。曹長青向四個人解說自由民主e5可貴就是尊重無仝意見及觀點,這是目前中國所欠缺e5,ma7 tu2-tu2是台灣上蓋寶貴e5所在。無疑誤he四個人e5頭已經hou7「愛國」沖歹去ah,忽然間出手拍曹長青。   Chit種「愛國」e5野蠻行為m7是今仔日才有e5,早早ti7一九七九年佇中泰賓館內底合法申請批准舉辦美麗島雜誌創刊酒會,有一陣「疾風集團」違法聚眾包圍中泰賓館,用石頭khian人,大聲辱罵人。中國國民黨e5治安人員寵seng7 chit陣人妨害、威脅別人e5自由。「疾風集團」e5口號是:愛國敢有罪? 英國文人鍾孫(Samuel Johnson)講:「愛國是無賴漢最後e5藉口。」一點仔都無m7-tioh8,chit幾年來一直亂台灣治安e5組織叫作「愛國同心會」,治安機關放hou7 in 非非sam2做,實在會hou7人煩惱。 m7知chit陣無賴漢「愛國」欲koh愛偌久?
 
< Prev   Next >