首頁 arrow 綠色短評 arrow 那有hiah濟「口誤」?實在真「可惡」!

那有hiah濟「口誤」?實在真「可惡」! PDF 列印 E-mail
發表者 李南衡   
2013/10/11, Friday
有關「洩密案」舞beh歸個月,因為檢察總長黃世銘定定家己piak料,情勢那像愈來對馬英九總統愈不利。馬總統tio̍h去台北地檢處作證的前一工九月初二,安排接受電台節目主持人周玉蒄專訪。主持人問馬總統,黃世銘檢察總長八月三十一暗幾點去你的官邸?馬總統講暗時八點半。隨時有網友用馬總統家己的「面冊」所發表的相片tōng破雞kui,八月三十一暗馬總統猶佇水利署防災中心了解風颱災情的時間是:暗時八點五十六分0二秒。八點半那有可能佇總統官邸接見黃世銘咧?總統府發言人李佳霏緊跳出來解釋講,馬總統第一遍kah檢察總長黃世銘佇寓所聽伊報告的時間是八月三十一晚時九點半。Hit暗總統八點到水利署,九點離開。黃總長的車九點半到位、十點十分離開。馬總統佇電台接受訪問的時,講黃總長晚時八點半到伊的寓所是「口誤」。

 

九月初九記者會,黃世銘總長講伊八月三十一暗時十一點到總統官邸報告關說案。十月初一,立委陳其邁佇立法院詢問國安局長蔡得勝有關黃世銘總長入去總統官邸的時間,特勤中心答覆是八月三十一暗時九點半ùi第三號門入去。講來講去,三種講法時間對起來。好lah,準講有影是「口誤」,黃總長確實是九點半入去總統官邸,黃總長講差不多有四十分久。按呢,馬總統佇電台專訪的時,家己落下頦講,Hit暗十點伊有叫行政院長江宜樺kah總統府副秘書長羅智強來寓所參詳。若攏照in講的,四個人暗時十點仝一個時間佇總統官邸,變作有影有「滅王四人幫」。馬總統thiau黃總長kah江院長、羅副秘書長佇官邸的時間thoah開,馬總統講伊聽黃總長報告了才叫江院長、羅副秘書長來寓所講͘ in聽、the̍h監聽譯文kah偵訊林秀濤、陳正芬檢察的內容͘ in看,來證明無hit號啥物「滅王四人幫」。馬總統伊聽來刑案偵辦中內容kah監聽譯文,kohhông聽才拄拄犯tio̍h「洩密罪」,敢講chekoh是馬總統「口誤」?

十月初二,馬總統佇電台專訪的時,講黃總長來向伊報告進前伊完全知伊beh來報告啥。十月初八,陳其邁立委質詢黃世銘總長:你佇電話中有先總統講是柯建銘kah王院長的司法關說案抑無?黃總長講:有講大約仔。敢講chekoh是馬總統「口誤」?馬總統佇電台專訪的時講伊看報告猶有一寡所在無明白,第二工九月初一才拍電話叫黃總長koh來官邸說明。十月初七,黃總長家己piak料講八月三十一半暝十一點外,總統拍電話叫伊第二工九月初一koh去總統官邸。Hit陣伊坐佇楊榮宗組長車底拄beh到厝。敢講chekoh是馬總統「口誤」?

 

那有hiah濟「口誤」?實在真「可惡」!

※週一8點整、13點整、17點整於電台播出。

 
< 前一個   下一個 >