首頁 arrow 綠色短評 arrow 特偵組看tio̍h鬼!

特偵組看tio̍h鬼! PDF 列印 E-mail
發表者 李南衡   
2013/10/18, Friday
九月初六,馬英九總統發動政爭以後,才hông查出八月三十一風颱暗,檢察總長黃世銘拚去總統官邸向馬總統報告立法院長王金平kah立法院民進黨總召柯建銘涉嫌司法關說,原來資料是ùi監聽來的,才會有電話譯文kah通聯紀錄。  特偵組聲聲句句講in是合法監聽,但是,民進黨立委管碧玲懷疑特偵組有可能違法監聽,要求提出監聽票來立法院備詢。九月二八看tio̍h監聽票才發現,用陳榮和案「100年特他61號」一張監聽票,幾那年無限制掛無仝人的電話監聽,͘管碧玲立委koh khah大驚一跳的是監聽電話內底有一支是立法院無對外公開的總機號碼「0972」。特偵經監聽國會總機電話?夭壽oh!無管偌呢獨裁橫霸的政府mā m̄敢公然監聽國會的總機,看特偵組beh按怎辯解!

 

第一時間,特偵組發言人、檢察官楊榮宗組長開記者會否認非法監聽立法院總機電話,伊講七遍:「0972」絕對是立法院總機電話,he是立法委員柯建銘助理的手機仔。台灣人真信鬼,閒閒罔拍hit支電話,一時之間比電視廣告歸年的「0800koh khah出名、koh khah濟人拍,聽tio̍h攏是仝款hit話:「立法院你好!」hit暗檢察總長黃世銘緊開記者會向全國人民會失禮,講是失覺察。特偵組講in向法院申請監聽hit支電話雖然三個月,事實上才監聽一個月niā-niā而且in the̍h轉去的光碟完全空白、啥物都無錄tio̍hIn絕對使講有錄tio̍h啥物,若有,所有的立法院歸個月拍出、拍入的電話攏總有錄音,代誌to̍h m̄小可大條lo̍h!受委託錄音的調查局講,特偵組除了假日以外,差不多每工攏有人來the̍h錄音光碟轉去,歸個月的光碟攏無聲,是按怎攏無發現tio̍h?是按怎beh監聽林秀濤檢察官去聽tio̍h林檢察官十二歲查某子的電話,那會無幾工就發現tio̍h?到底是特偵組teh騙鬼?抑是特偵組teh講鬼話咧?

法務部的調查報告講,因為立法院hit支「0972」是節費電話,掠準是一般手機仔,事先無講清楚監聽才錄音bē tio̍h。十月十六,立法院交通委員會召委管碧玲變更議程,邀請國家通訊傳播委員會主委石世豪chhōa通訊營管處長、資源技術處長koh邀請清華大學電機系教授呂忠津、交通大學資工系教授林盈達來,說明節費電話會tàng監聽無?需要特殊設備抑免?光碟是按怎會空白?等等問題。結論是若有電話號碼,無管啥物節費電話攏一定會完全錄音。敢講連法務部tio̍h鬼?另外,照通聯紀錄來看,特偵組bat拍「0972hit支電話。啥人拍的?特偵組無一個人承認。無人拍,電話那會家己拍去立法院無公開號碼的總機?那會hiah奇?那會hiah怪?想來想去只有一個可能:鬼拍的!

 

 

※週一8點整、13點整、17點整於電台播出。

 
< 前一個   下一個 >