首頁 arrow 綠色短評 arrow 歹人攏是按呢軟土深掘!

歹人攏是按呢軟土深掘! PDF Print E-mail
Tuesday, 12 August 2008
住佇圓山飯店e5曹長青佇圓山飯店大廳hou7四個人拍,無代誌;用腳踢當時擔任阿扁總統辯律師顧立雄,無代誌;佇大街路用手股頭long3許世楷前駐日代表無代誌;咱chit個社會已經hou7中國國民黨政府舞ka2無是非,台灣人已經養成讓步無愛惹事e5生活態度,寵seng7歹人,hou7歹人想講全世界e5人攏驚伊,那像食了知味,愈變愈好款,才會發生蘇安生cham3阿扁前總統e5事件。 蘇安生cham3阿扁前總統了後,特別是阿扁總統感覺腰骨會疼,去病醫檢查發現龍骨倚尾椎e5所在有tioh8傷。藍營媒體相爭訪問蘇安生e5時,伊那像一時間變作「民族英雄」,伊大聲講一寡類似chit款e5話:Chit種be7見笑e5人專做be7見笑e5代誌、全台灣kan-ta我有法度對付伊(阿扁總統),我是代表十幾億中華同胞cham3陳水扁e5,我cham3,是對伊奉行e5“台獨”政策e5警告。我ka7 cham3一下有hiah嚴重嗎?   Chit個「愛國同心會」「特勤組長」蘇安生是一個前科累累e5人,伊佇越南出世、隨in老父去中國才來台灣,有殺人、竊盜、偽造文書等前科。伊ui3後壁偷cham5阿扁前總統了後,及「愛國同心會」e5人去總統府seh8五輪講欲向馬英九總統陳情控告阿扁前總統。Koh佇大街路表演伊按怎cham3阿扁前總統e5「無影腳」e5厲害。原本台北地方法院簡易庭裁定拘留三工,蘇安生不服提出抗告,而後撤回抗告講:cham3阿扁一下關三工,真值。   蘇安生koh放調講:七月廿六下晡兩點,佇西門町捷運六號出口舉辦「一對一擂台賽」,接受阿扁支持者及各方e5批評及交換意見。Koh講伊每工早時十點攏會去台北市仁愛路林森南路口e5台大醫學院運動場拍籃球。   廿六早起十點外,蘇安生運動了佇仁愛路林森南路口hou7兩個報名是台灣國衛隊e5生分人,夯鐵棍仔及柴棍仔見面就ka7摃,致使伊左手腕骨折、頭殼ma7有小可tioh8傷。兩人欲離開進前koh ka7警告講:日後若koh按呢濫摻,見一擺就拍一擺。經過路邊e5人看tioh8報警,送去和平病院治療。   Chit個家己想講是全台灣上勇e5蘇安生入院了後,「愛國同心會」會長門劍秋表示,蘇安生目前人身安全真危險,已經要求病院be7使向媒體抑是外人透露伊住院e5病房號碼,而且要求警方戒護。   蘇安生經過chit遍hong5修理了後,咱會tang3期待台灣社會可能有半年以上e5安靜,因為蘇安生及「愛國同心會」hit陣人假那已經知影,原來in及別人仝款ma7是有皮有肉有骨,hong5拍猶原會疼。
 
< Prev   Next >