首頁 arrow 綠色短評 arrow 請聽數字講啥物話!

請聽數字講啥物話! PDF Print E-mail
Written by 李南衡   
Friday, 01 November 2013
因為大統棉籽油「毒油」piak孔了後,逐家才知影棉籽油是啥物,原來佇中國抑是東南亞作料理用的棉籽油,是有經過精煉、漂白、脫色kah脫臭等程序了後,完全除去棉籽油內底的「棉酚」才會tàng使用。長期使用精煉不足的粗製棉籽油,會造成生殖細胞損害,致使生子。早前有的國家,用伊來作男性避孕藥,但是1998年世界衛生組織認為可能造成不可逆現象,就是講若停止食,無法度恢復原本的生殖能力,所以連避孕的用途禁止使用。真夭壽,大統有摻棉籽油的各種油品暢銷全台灣,兵仔營攏用大統的油,真濟縣市的真濟學校營養午餐攏用大統的油,照按呢,免幾年台灣人就滅種無後代lo͘h

 

棉籽油到底是啥人進口的?查出來棉籽油進口大戶是富味鄉食品公司,經衛福部證實,舊年進口7,619噸的粗製棉籽油,大約有六成也就是有差不多4,571噸流入去富味鄉。伊是台灣上大間的麻油工廠,麻油的市佔率八成。立法委員林淑芬懷疑富味鄉有棉籽油摻佇in公司出品的麻油內底。但是富味鄉的執行副總經理林秀蓉講in公司進口的棉籽油,經過精煉了後全部外銷,主要是銷去新加坡、香港、澳洲、加拿大、菲律賓。林淑芬立委質疑,根據海關棉籽油出口資料,舊年台灣出口攏總570噸,今年一月至八月攏總出口418噸,富味鄉財報顯示麻油製品、一般油品以外的其他油品,舊年出口129噸,富味鄉舊年進口棉籽油約4,571噸,數字完全鬥合,chhun-ê 四千幾噸走去叼位?富味鄉猶koh開記者會「死鴨仔硬嘴pe」講in進口的棉籽油經過精煉了全部出口。Hit下晡,新北市衛生局根據林淑芬立委的資料去富味鄉設佇五股的公司查問,到底一年進口偌濟棉籽油、外銷偌濟,一開始猶原講仝款的話,新北市衛生局長要求富味鄉提出出口文件來證明出口數額。富味鄉chit聲才承認進口的棉籽油有摻入去in公司生產銷售的麻油內底。足無良心的,是用俗俗仔、有敗害的棉籽油摻入去貴蔘蔘的麻油內底, 24種油品:包括四種無仝包裝的「芝麻香油」、三款「黑麻油」kah「大利」、「大豐」、「大吉」等十一種無仝標頭的「芝麻香油」,有摻棉籽油,差不多有摻三成的量,引起全台灣koh khah大的驚惶。

 

人講「數字會講話」,數字到底咱講啥物話?衛服部講幾種油驗無「棉酚」,食品科技博士、台北市長郝龍斌講,棉籽油內所含有毒的「棉酚」足無簡單驗,驗出來並是無。衛服部那會無愛用khah精密的儀器來驗咧?若照林淑芬立委用國校一年加減算術去查,無親像衛服部所講的hiah呢困難。數字咱講啥物話?講有人真gâu講白賊,有人會曉用頭腦,有人真懶屍。

 

 

※週一8點整、13點整、17點整於電台播出。

 
< Prev   Next >