首頁 arrow 綠色短評 arrow 奧運開幕,不准離婚!

奧運開幕,不准離婚! PDF 列印 E-mail
2008/08/12, Tuesday
對中國人來講,chit遍會tang3佇北京舉辦Olympic世界運動會,是有史以來頭一擺,當然值得慶祝歡喜,全中國各所在攏有真濟人去登記,預約欲ti7八月初八hit工辦理結婚。到開幕前一工為止,北京有一萬六千外對、上海四千七百外對、廣州三千兩百外對、重慶三千外對﹒﹒﹒。咱祝福in幸福快樂。    總是ma7有人婚姻生活無順序、無幸福快樂,致使想欲離婚。一年三百六十五工to2一工攏會使離婚,你是按怎thiau工揀一工全中國大歡喜e5日子來離婚咧?實在是歹彩頭,當然不准!   這hou7我想起蔣介石威權統治台灣e5時,伊生日hit工,所有報紙e5電影廣告攏be7使出現類似妖魔鬼怪死亡等一寡歹字,像講電影名「打擊魔鬼」,hit工就會變作「打擊」。Chit陣想起來那像笑話,hit當時是無人敢哼一聲、ma7無人敢笑一聲。M7知老蔣生日hit工會使出山抑be7?假那無聽人講起。   Khah過份e5是蔣介石e5死。蔣介石ti7一九七五年四月初五死去,伊一個人死去及咱有啥關係?關係大ou3!因為第二工行政院宣布四月初六起一個月是「國喪」,那像是全國攏teh死人。「國喪」期間,全國軍公教人員攏tioh8穿素色e5衫,而且tioh8帶孝。Koh khah好笑e5是所有彩色電視畫面一律改作烏白(十五年後一九八八年in子蔣經國死去e5時ma7按呢舞),全台灣所有e5娛樂、宴會及各種慶祝集會禁止三十工。後來因為考慮禁止娛樂三十工傷久、影響傷大,才改作到四月十六蔣介石移靈hit工為止。原本早早就日仔看好、帖仔印好、餐廳飯店訂好e5結婚式,講結婚式be5使放炮、be7使佇餐廳飯店頭前徛牌仔用紅紙寫某某府喜事,正當隆重e5婚禮煞變作那像賊仔按呢偷偷仔舉行。   今年八月初八佇北京舉行世界運動會開幕hit工,是按怎be7使辦離婚登記?有人抗議講:那會無愛規定hit工be7使破病、be7使死去?我認為按呢講有khah過頭,中國政府敢m7是啥物都teh講「文明」?應該規定八月初八hit工,全國大官百姓攏be7使放屁,相信會hou7中國e5空氣大大改善。 聽講是因為抗議聲傷大,北京是chit遍世運會e5主辦城市,特別引人注目,就緊宣布講,八月初八hit工歡迎來登記結婚,及全國人民做夥歡喜;若是有人欲登記離婚,阮絕對無禁止e5理由,隨時攏會使來辦理。 有一寡都市反應khah慢,koh明知家己理khah無直,話都講出去ah,只好解說講,八月初八是好日,登記結婚e5人傷濟,阮腳手無夠才會講無欲hong5辦理離婚登記,並m7 是禁止。假那愈描煞愈烏咧!
 
< 前一個   下一個 >