首頁 arrow 綠色短評 arrow 你敢會曉小學一年的加法減法?

你敢會曉小學一年的加法減法? PDF 列印 E-mail
發表者 李南衡   
2013/11/15, Friday
十一月十三出版的《壹周刊》piak孔:2009年西班牙政府有寫批͘咱政府,警告台灣市面上西班牙進口的橄欖油有可能摻假。咱衛生署「不動如山」,hit陣的署長是葉金川;2011年西班牙政府koh再寫批警告咱政府,仝款完全無顫悶ZA(chùn-būn) tio̍hhit陣的署長是楊志良。十一月十四現此時的衛服部老實招來,講確實有hit兩張西班牙政府寫來的批。Chit-má台灣的摻假的橄欖油會變kah chiah呢嚴重,當時的衛生署長kah下面相關的官員敢攏無責任?敢攏免追究?

 

頭殼khah-bái的人可能會問,西班牙駐台辦事處那會hiah厲害?我講,in有讀小學一年的算術加法kah減法。上好的橄欖油「初榨優質油」,佇西班牙每公升成本差不多四、五歐元,差不多新台幣兩百至兩百五,加上運費koh加通路商的利純,每公升至少mā-tio̍h賣四、五百箍,但是佇台灣零售價差不多攏超過四百箍,比西班牙超級市場teh賣的koh khah俗。啥道理?Koh再講,Ùi 2001年以來,台灣出現愈來愈濟「家己講的」西班牙純橄欖油產品,但是照in的出口資料來看,台灣ùi西班牙進口的橄欖油一年比一年khah少。市面上hiah濟的西班牙純橄欖油是ùi tó位生出來的?用腳頭u知影有不肖廠商透lām別種油。

最近新聞報導咱才知影,橄欖油分作幾個等級,上好的是「初榨優質油」會tàng淋佇沙拉、是煎炒用的;第二級是「精煉油」,上蓋低級的是用回收的橄欖渣經過化學品提煉的「橄欖粕油」,佇歐洲是作工業用的。因為價數真俗,台灣烏心廠商四年進口三千外噸來摻,伊那像無騙你,有影是「橄欖油」。若是干單價數俗品質差,猶無嚴重,可惡的是「橄欖粕油」食濟會致tio̍h癌症。

Chit遍毒油事件會愈舞愈大愈恐怖,tio̍h感謝彰化縣衛生局長葉彥伯所帶領的食品科團隊。舊年十月,葉彥伯局長接tio̍h檢舉「大統長基的橄欖油有問題」,經過幾遍檢驗油品kah現場稽核攏chhōe無進一步的證據。今年六月,衛生局食品科長林毓芬提議:Ùi大統橄欖油進口量kah出售量來查看māi。組員許婉貞去細膩查對,發現今年三至五月大統進口三萬噸橄欖油,卻賣出五萬噸,照按呢查落去才變作檢調介入偵辦的重要關鍵。仝款的算術,林淑芬立委質詢的時講根據海關棉籽油進出口資料,舊年總出口總570噸,今年一至八月總出口418噸,干單富美鄉一間舊年tio̍h進口4,571噸,富美鄉講所有進口的棉籽油全部出口,四千外噸走去?新北市去查富美鄉就是問in出口偌濟?單據theh來看māi!富美鄉才乖乖認罪。聽衛服部講in無法度檢驗che無法度檢驗he,聽tio̍h人真受氣。足愛問衛服部長kah伊所領導的大細粒官員:你敢會曉小學一年的加法減法?

 

 

※週一8點整、13點整、17點整於電台播出。

 
< 前一個   下一個 >