首頁 arrow 綠色短評 arrow 那會差hiah濟?!

那會差hiah濟?! PDF 列印 E-mail
發表者 李南衡   
2013/11/22, Friday
佇台灣bat買厝的人攏知影,為tio̍htàngtio̍h一間厝來徛,koh驚厝價會愈來愈貴,日後買起,儉腸nè肚付會起自備款tio̍h緊去買起來,無夠的錢當然是chhōe銀行貸款,一般是會tàng向銀行貸款六成,特別優待若會tàng貸到七成tio̍h歡喜kah謝天謝地。報導講,最近出代誌的頂新魏家一下手買台北市上貴的帝寶九戶,竟然會tàng向銀行貸款九成九,自備款一葩niā-niā!那會差hiah濟?咱khah關心的是:續落按怎?中央銀行總裁彭淮南認為頂新魏家:「有藉銀行融資、炒作豪宅價格之嫌。」要求銀行收回借款,貸款成數降到六成。

 

文化部長龍應台佇台北市北平路文化部有一間辦公室,佇台北市天津街行政院院區原本的新聞局有留一間龍部長辦公室,最近kohtio̍h台北市南海路台灣工藝研究發展中心台北分館真合意,beh設一間部長辦公室。猶有,明年一月文化部beh搬去新北市新莊了後,有人供體(keng-thé) 龍部長是龍太后,害咱煞一間是夏宮、冬宮、秋宮?應該是無「春宮」才tio̍h。續落按怎?立委黃文玲佇立法院質詢的時,行政院長江宜樺講:一個部長無必要有兩個以上的辦公室。

陽明山國家公園內有一位七十一歲的婦人人,佇十三坪國有土地頂面搭棚種花約十個月,͘巡山員舉發送辦。苗栗縣長劉政鴻的小弟劉政池佇陽明山國家公園內伊的別莊前佔用國有土地一千二百外坪,koh挖一個差不多籃球場大細的秘密地窟,挖出一萬外立方公尺的土方一車一車載去賣,差不多賣有兩百萬。國產署kah陽管處有派人去探勘,干單要求「樹仔種倒轉。」輕輕罰六千箍。十一月十四,台北地檢署用「金屬探測器」查出來有秘窟,才直接出動怪手挖破,草埔仔下面有埋十二個貨櫃相連的秘密通道。國有財產局kah陽明山管理處將近十年來攏無看tio̍h、攏知。續落按怎?內政部長李鴻源講:「我已經請政風處歸個事件做一個瞭解,查清楚了後看有行政疏忽抑無。」

大統長基爆發油品案歸個月了後,彰化縣衛生局限期業者不法油品下架回收,提出回收報告,業者拖了koh拖,十一月十八第三遍交白卷,衛生局罰伊三百萬。按呢,到十一月十八為止,大統行政罰款已經累積到十八億五千六百萬,富味鄉罰四億。公司愈查愈大間,罰款煞愈罰kiu水。平平使用大統油品的福懋干單罰八百萬,koh khah大間的頂新才罰三百萬。那會按呢?講是因為認定in標示不實,一件罰二十萬。續落按怎?那像無人知。干單知影味全佇四大報登廣告,九遍講媒體報導失真、紛亂,甚至講in味全偌呢受委屈。提出「一個真相、一個澄清」強調無「烏心、絕對無暴利。」那會賊khah惡人。那會差hiah濟?!

 

 

※週一8點整、13點整、17點整於電台播出。

 
< 前一個   下一個 >