首頁 arrow 綠色短評 arrow 中國佇粒仔頂面抹化粧品!

中國佇粒仔頂面抹化粧品! PDF Print E-mail
Thursday, 21 August 2008
二00八年北京奧林匹克世界運動會,對中國來講是有史以來第一遍,當然tioh8好好表現一下。所以拼beh hou7全世界e5人看tioh8中國富強和平e5一面,hou7全世界e5人對「中國興起」留tioh8深刻e5印象,Chit個北京奧運會ma7是in所講e5「中華民族百年之夢」。 Chit遍奧運會開幕式特別安排中國五十六個民族仝場表演,就是beh kang5講「中華民族m7是kan-ta漢族」nia7-nia7,beh hong5感受tioh8 in是hiah濟大小民族e5和平大融合。各族人民穿五花十色e5傳統服裝,那像真sui2 e5化粧品,可惜無法度掩蓋當teh pu7-膿e5粒仔-中國政府對境內少數民族e5欺壓,親像前無偌久e5西藏暴力鎮壓,及最近佇新疆維吾爾自治區一再發生維吾爾族人e5爆炸攻擊事件。   北京現在已經chhun無偌濟古香古色e5「胡同」及「四合院」,chiah-e5真濟是清國、明國、甚至是六﹑七百年前e5元國時代起造e5,中國政府為tioh8北京奧運拓寬道路及日後建商beh起大樓,講chiah-e5是「危險tioh8改建」,強迫住戶遷移到市郊,及厝hong5拆掉去起各種運動場e5人仝款運命,所得e5補償無夠in去市郊租厝。Ui3大路看過去hiah-e5 hong5拆掉e5舊厝無好看,臨時搭懸懸e5牆壁ka7遮chah8起來,牆壁頂面koh有畫圖,那像化粧品hiah sui2,但是無法度掩蓋中國政府破壞北京歷史風貌、人文及社會和諧e5 hit粒粒仔。   中國各地方e5異議份子抑是「維權律師」及其他有問題e5人物,ti7北京奧運期間不准入京。佇北京e5異議份子江棋生ti7北京奧運會進前就hou7國保警察約談,叫in翁某轉去故鄉抑是去外地旅遊,in無答應,警察講若按呢阮就愛來恁chia上岡(就是監控軟禁e5意思)。江棋生應講恁愛按怎「上」就按怎「上」,橫直我就是佇厝裡。另外一位出名e5作家劉曉波ma7仝款待遇。   佇北京看tioh8奧運新起e5各種運動場、建築物,包括舉行開幕式及各種比賽場e5「鳥仔巢」,特別為各種游泳比賽設計e5「水立方」游泳館,攏hong5感覺真sui2真有氣魄,攏是世界級e5,che那像世界一流e5化粧品,m7但sui2、koh有芳味。總是化粧品無論抹偌呢厚,ma7掩蓋be7 tiau5化粧品下底,為tioh8 ka7 chiah-e5奧運比賽場地及建物拼命起好了後,就hong5趕離開北京e5六十萬建築「農民工」,原來in及另外二百四十萬佇北京討趁做苦工e5「農民工」仝款,ti7北京奧運會期間攏tioh8離開北京,轉去in遙遠故鄉e5悲慘運命。   無m7 tioh8,無論中國政府偌呢敢開錢、偌呢gau5化粧,無論化粧品偌呢芳偌呢sui2,ma7無法度掩蓋直直teh pu7膿e5粒仔。
 
< Prev   Next >