首頁 arrow 綠色短評 arrow 原來中華民國是虛擬的!

原來中華民國是虛擬的! PDF Print E-mail
Written by 李南衡   
Friday, 06 December 2013
十二月初三,國立台北教育大學李筱峰教授,佇伊的面冊頂面傳一張教育部函文的相片,頂面講「依據中華民國憲法,目前我國首都應該是南京。」李教授痛批:馬政府起siáukoh beh叫台灣學生kah in做夥起siáu。其實,李教授若瞭解中華民國根本就是虛擬的,伊tio̍h bē hiah呢受氣。

「憲法」是一個國家的根本大法,《中華民國憲法》第一條講:「中華民國基於三民主義,為民有民治民享之民主共和國。」亂講,咱干單the̍h三民主義的民生主義來講tio̍h好,民生主義上重要的兩個主張:第一是土地問題,孫文主張都市平均地權,漲價歸公;第二是資本問題,孫文主張節制私人資本,發展國家資本。M̄是一項做無夠,中華民國政府佇台灣所做的,大學畢業生一個月薪水兩萬二、八百年薪水才買會起台北一間兩億的厝,台灣人貧富差距hiah大,拄拄kah孫文的主張的顚倒頭行。可見《中華民國憲法》根本是一部虛擬的憲法。

教育部的公文講「依據中華民國憲法,目前我國首都應該是南京。」事實上,《中華民國憲法》第四條有寫「中華民國領土,依其固有之疆域。」固有領土指啥物所在?siáng知。第六條有寫「中華民國國旗定為紅地,左上角青天白日。」但是無一條寫tio̍h中華民國首都是南京,可見寫虛擬公文的教育部是一個虛擬的部。行政院內底猶有一個虛擬的部會叫作「蒙藏委員會」,講是管蒙古kah西藏。蒙古?Tī 1924年就獨立的「蒙古」hit-ê聯合國會員國,講是連聯合國會員國都是的「中華民國」所管的?驚笑破人的嘴!chit兩個部會所屬的中華民國政府當然是虛擬的政府。講「中華民國國都定佇南京。」chit句話無寫佇《中華民國憲法》,是寫佇《五五憲草》內底。《五五憲草》是民國二五年(1936)憲法起草委員會所制定的。第四條有寫中華民國領土包括偌濟所在。內底那會無台灣咧?真失禮,hit陣的台灣是大日本帝國的領土,kah中華民國一點仔關係都無。

看電視報氣象的人比chiahia,連鞭高氣壓ùi chit旁徙過hit旁,低氣壓ùi hit旁徙來chit旁,看伊比kahsúi氣,事實上氣象主播比來比去的是一塊啥物都無的藍色板,咱佇電視所看tio̍h的各種精彩的畫面,其實攏是導播key佇板面͘咱看的,he叫作「虛擬攝影」。仝款的道理,中華民國政府佇一塊啥物碗糕無的藍色板面,比腳畫手講啥物《中華民國憲法》、講啥物『中華民國首都是南京』、講啥物「咱攏是黃帝的子孫」、講啥物「核能發電廠若是危機失控的時、會tàng摧毀核電廠」,原來攏是虛擬的。虛擬的中華民國政府,叫咱tio̍hkah比真實的世界koh khah真實。實在真可惡!

 

 

※週一8點整、13點整、17點整於電台播出。

 
< Prev   Next >