首頁 arrow 綠色短評 arrow 台灣人那會chiah呢傷心受氣?

台灣人那會chiah呢傷心受氣? PDF 列印 E-mail
2008/08/21, Thursday
八月十四,阿扁前總統開記者會講in某有將大筆錢滙去國外,而且因為無誠實申報選舉款,向大眾會失禮。 前副總統呂秀蓮講:那有hiah戇hiah貪e5代誌!一向hong5敬重e5台灣紳士、台獨聯盟主席黃昭堂講:「真漏氣真遺憾,佇外國人面前真見笑!希望伊(阿扁前總統)會tang3佇台灣消失去!」連chiah呢重e5話都講出來,就會知影台灣人偌呢傷心受氣。台灣人那會chiah呢傷心受氣?   咱先mai3管阿扁前總統滙偌濟錢出去、按怎滙,hiah-e5是啥物錢。Kan-ta講一個任內e5總統滙大筆錢去外國,就已經m7 tioh8,對不起台灣chit塊土地及全台灣所有e5人民ah!身為總統e5人按呢做,敢m7是表示伊對台灣無信心?若是按呢,支持伊e5台灣人beh按怎?那會be7傷心受氣咧!   報紙寫講記者會hit工,阿扁前總統「坦誠」講伊m7 tioh8。Chit點ma7是hou7台灣人真傷心受氣。伊若是實在有「坦誠」,應該ka7所有e5責任由伊家己一個擔起來,那會使講in某bat ka7大筆錢滙去國外、今年初伊才知影?koh khah無應該講到in子in媳婦。伊若實在有「坦誠」,就無應該牽拖別人、講李前總統抑是啥人按怎按怎。伊若實在有「坦誠」,就應該ka7所有e5代誌,包括偌濟錢、錢e5來源、錢e5去向等等,一遍交待清清楚楚,那會使親像teh「擠齒膏」一遍「擠」一寡仔。台灣人傷心受氣到無心情看chit款拖棚e5 au3戲!   扁嫂阿珍講伊所滙e5錢有四個來源,攏無垃圾錢。咱先mai3懷疑錢e5來源,就是所有e5錢攏是清氣錢,滙出美金二千萬差不多是台幣六億外。想看mai7,ui3阿扁前總統競選台北市議員、台南縣長、立法委員、台北市長、總統,to2一遍m7是千千萬萬e5台灣人一百三百、五千一萬按呢贊你e5?阿扁前總統chit-e5貧農子弟可能be7記得每一個善良台灣人所捐出e5錢,攏會使糴米neh,人是按怎提hou7你?是因為對你有期待,期待你為台灣拍拼,替in為台灣做代誌。你既然有錢,敢be7使提一寡出來hou7散到鬼beh掠去e5民進黨?敢be7使提一寡出來幫助生活困苦e5人?Hiah濟錢你敢攏用會tioh8?che ma7是hou7台灣人傷心受氣e5所在。   台灣人傷心受氣以外,ma7 tioh8反省。咱be7使koh有個人偶像崇拜,be7使koh寵seng7任何一個政黨抑是政治人物。贊助支持、ma7 tioh8監督。咱原本就是藉tioh8支持某一黨某一個人來表達咱對台灣e5關心及疼惜。   台灣人緊ka7傷心受氣收起來,咱tioh8繼續支持be7 hou7咱失望e5台灣!
 
< 前一個   下一個 >