首頁 arrow 綠色短評 arrow 馬英九當選「歹人中的大歹人」,恭喜哦!

馬英九當選「歹人中的大歹人」,恭喜哦! PDF 列印 E-mail
發表者 李南衡   
2013/12/20, Friday
「十大惡人」票選,是「宅神」朱學恒所舉辦的。咱台灣話講「惡人」(ok-lâng)是講一個人脾氣真bái、愛大細聲罵人。華語的「惡人」咱講作「歹人」(phái-lâng)Chit遍票選希望網友kah路邊受訪問的人會tàng選出in心目中上「歹」的人。 朱學恒先佇網路頂面宣布chit-ê活動消息,請網友提名。原本建議的名單有二十幾位,網友佇網路頂面討論結果,hông提名票選上紅的前十名是:Kā咱偷the̍h hit五年的馬英九,烘焙王胖(pháng)達人,如來神掌桃園縣蘆竹鄉代王貴芬,東鞋西毒苗栗縣長劉政鴻,黃埔軍魂洪仲丘案hit陣人,自油發揮的大統公司負責人高振利,歸個城市攏是我的化工廠統一企業,天方夜談的遠雄集團董事長趙藤雄,門當戶不對阮女朋友的媽。十二月十二票選「十大歹人」的宣傳影片上You Tube了後,三工tio̍h吸引三十外萬人點來看。 十二月十八暗公布票選結果,馬英九遙遙領先眾歹人,是第二名加第三名票數的四倍,有網友講,馬英九你怪我m̄-bat選你,Chit遍特別選你。有網友講,馬英九是歹人中的大歹人,若無伊,tio̍h無以外chit九個歹人。民意干單chhun九點二葩的馬英九,萬萬想bē到佇票選「十大歹人」的活動中會chiah呢受歡迎。 可能是第一遍辦chit-ê活動的關係,經驗有khah無夠,猶有真大的進步空間,提供幾點意見hō͘「宅神」朱學恒作參考,希望明年辦第二屆的時,會有koh khah 好的成績。 第一、候選人的名單無夠理想,事實上chit十大歹人中有幾個無hông感覺有hiah呢歹、歹到有資格hông稱作「十大歹人」,像講門當戶不對阮女朋友的媽,若會tàng hông選作「十大歹人」的一個,借問,白賊義咧? 第二、那親像朱學恒家已所講的:「歹人年年有,今年特別濟。」既然知影按呢,今年猶未過了,那會使提早tī十二月中提名kah選今年「十大歹人」咧?無疑誤十二月中,彰化piak一個「日月明功」案,高雄piak一個「日月光」排毒水案。無顧台灣環境的環保署長沈世宏,對清境農場國土保育亂亂講話的內政部長李鴻源,「歹」的程度kah影響力,敢會輸如來神掌的王貴芬?明年辦第二屆,應該等一年完全過了來選,才免事後增設「遺珠之憾特別獎」hō͘ 日月光。 第三、網路票選的人傷少,既然三工有三十外萬人點看票選「十大歹人」的廣告,三百外人投票算作啥物?主辦單位應該koh khah用心鼓勵網友投票。 一馬當先,馬英九勇奪「十大歹人」的頭名、肯定伊是「歹人中的大歹人」,表示台灣人目睭無hō͘蜊仔肉糊tio̍h,台灣人猶koh看會真看會明,台灣猶有救。 ※週一8點整、13點整、17點整於電台播出。
 
< 前一個   下一個 >