首頁 arrow 綠色短評 arrow 咱攏是無名小卒!

咱攏是無名小卒! PDF 列印 E-mail
2008/08/29, Friday
佇美麗島事件e5恐怖氣氛中,鄭勝助律師好膽徛出來,m7但為軍事審判e5施明德,ma7為司法審判e5紀萬生一陣人義務辯護。In坐監出來了後,攏有來拜訪鄭律師ka7說謝,獨獨施明德做到民進黨主席、立法委員,竟然m7-bat踏腳到,甚至連一通感謝e5電話都無。
我ka7鄭律師講:施明德可能無錢,我提一箍銀來互伊,拜託伊kha3一通電話hou7你。鄭律師笑笑仔講:mai3啦,mai3按呢啦!其實我替in辯護並m7是為啥物人,我kap in大部分e5人攏無識似。我是為台灣民主、自由及人權teh辯護。鄭勝助律師得tioh8 e5報賞是,hit幾年伊想欲出國旅遊,警備總部攏ka7批示:免議。
  許晴富長老因為偷藏美麗島事件要犯施明德,佇偷藏hit段期間操心擘腹免講,施明德hong5掠去以後,伊ma7 hong5掠去判刑坐牢七冬,連長老娘江金櫻女士ma7 hong5掠去關了判刑兩年緩刑三年,放細子佇厝裡。我問講施明德敢bat來chhoe7你?無。請你食飯?飲一杯咖啡?無。連kha3一通電話都無。我聽到真受氣。許晴富長老講,m7 thang受氣。我按呢做那是為tioh8 欲hou7人報答一頓飯、抑是一杯咖啡咧?若欲愛報賞上緊e5方法是hit陣去密報有兩百五十萬賞金。咱應該歡喜e5是,佇台灣民主化、自由化、本土化e5運動中,咱bat出過一點點仔氣力,對得起咱e5子孫。按呢就到額ah!
無m7-tioh8!佇台灣民主化、自由化、本土化運動中間,有真濟人捐錢、出力,拼勢流汗、暗中流目屎。無管是支持個人抑是某一個政黨,攏是拍死無退。敢是為tioh8欲得tioh8啥?當然m7是!咱食粒ma7無、飲湯ma7無。但是咱敢bat發過啥物怨言?無!ti7威權統治之下,支持民主運動者,抑是行上街頭是偌呢大e5冒險?就是民主化到一個程度了後e5「五二0農民事件」,人民e5自由猶閣受tioh8相當e5 thun2踏,鎮暴車濺水、警棍kong3人,警察掠人。因為有濟濟咱chit款無私奉獻e5無名小卒,才會成就一寡政治明星佇舞台頂活動。那像一隻毛蟹,若是無hiah濟腳,無論偌大隻,伊根本是寸步難行。
咱看這幾十年來佇台灣e5各種大型抗爭運動,無管是一九八八年e5「五二0農民運動」、一九九0年e5「三月學運」、反對刑法一00條示威、抑是二00四年百外萬人ui3台灣頭手牽手牽到台灣尾,to2一遍m7是靠咱chiah-e5無求名無求利可愛e5台灣人?咱無管政權按怎改,咱對台灣疼惜e5心無變。咱為台灣e5民主、自由及主權拍拼,佇台灣向前行e5過程中有咱e5腳跡。雖然咱e5名叫作「無名小卒」,台灣e5前途佇咱e5手裡!
最後更新 ( 2008/08/31, Sunday )
 
< 前一個   下一個 >