首頁 arrow 綠色短評 arrow 台灣人權愈來愈bái,看beh按怎?

台灣人權愈來愈bái,看beh按怎? PDF Print E-mail
Written by 李南衡   
Friday, 03 January 2014
台灣人權促進會ùi 2000年開始,每年十二月初十國際人權日前後,公佈hit年度台灣人權十大新聞。過去chit三年開始結合社群網站,開放一般民眾參與人權新聞網路投票,來提高民眾ùi人權角度來解讀時事。今年人權新聞候選名單有列出民間社團推薦的二十外條。 今年上榜的人權事件內底,有人民食不安、有路無厝的情況下,無論是受害者抑是人權維護者為tio̍h有尊嚴活落去,只好上街頭行使公民抵抗權,隨時遭受tio̍h公權力的打壓,輕的四界chhōe人鬥相工四界碰壁,重的遭受司法起訴判刑。執政五年半的馬英九政府kah執政九個月的江宜樺內閣,過去chit年無生啥物雞卵、干單有放一寡雞屎。總評2013年的台灣人權績效:猶m̄是上bái、恐驚未來的兩年會koh khah bái!   咱看2013年入選的十大人權新聞,看tio̍h會心酸。第一條,大埔、華光強拆,濫滲徵收土地、全台各地抗爭無煞。釋字709號明確都市計畫中「聽證」的必要程序,變作有名無實。第二條,伴侶權益推動聯盟「多元成家民法修正草案」(也就是婚姻平權、伴侶制度、家屬制度),立法院提案審查。第三條,兩岸服貿協議影響誠大,但是無經過民主程序討論,政府烏箱作業衝擊台灣百萬服務業勞工。第四條,洪仲丘案民怨chhiāng-chhiāng滾,大大搖動軍事審判體制改革,軍審法快速通過修正,可惜相關配套措施慢慢仔tehe趖。第五條,309遊行有二十二萬人上街頭大聲喝廢核,馬政府猶原堅持家己的意見beh koh繼續起核四廠,抱核電抱tiâu-tiâu。第六條,關廠工人「官告民」移轉行政法院,出現轉機。但是,勞工職業災害、年金問題猶原仝款,全國勞工上街頭反「勞保年金不當改革。」第七條,集會遊行人權無進展,表達意見的自由koh khah受壓縮;毛振飛、林子文等社運工作者集會遊行煞hông關監,苑裡反瘋車一再遭受警察濫權暴力對待。第八條,特偵組淪作政治權力鬥爭的工具koh指揮辦案、thún踏法律程序,檢察總長黃世銘遭受起訴kah送檢察官評鑑。第九條「媒體壟斷防制kah多元維護法」生bē出來煞死佇腹肚底,反媒體聯盟譴責馬政府失信於民。第十條,侵犯原住民族傳統領域:邵族反向山BOT、卑南族卡地布反遷葬、阿美族加路蘭祖墓hông拆。「原住民基本法」無落實,子法擋佇立法院。   台灣人權愈來愈bái,看beh按怎?上好的方法是今年底七合一選舉,用選票表達台灣人的不滿,hō͘馬英九試一下民意的鹹chiáⁿ,2016年用選票hō͘中國國民黨政府落台,按呢台灣的人權,台灣的政治、台灣的經濟、台灣的社會才有救!
 
< Prev   Next >