首頁 arrow 綠色短評 arrow 對台灣司法拾轉來一點點仔信心!

對台灣司法拾轉來一點點仔信心! PDF Print E-mail
Written by 李南衡   
Friday, 10 January 2014
2011年二月,台灣電力公司tehe做南投變電所到彰化變電所之間的超高壓輸電線路工程的時,引起居民驚惶,「自救會」kah台電幾遍溝通,有達成「台電佇猶未取得縣政府的防汛道路通行許可進前,使進場」的共識。台電暫時有停止施工。仝一年三月初四,台電工程車駛入去北斗(pó-táu)市「防汛道路」beh進場施工,有成百人到現場聚集,彰化縣議員李俊諭kah十一名民眾有的坐、有的倒lè、有的徛,有人用o-tó-bái kā台電人員kah工程車圍,民眾周明文koh用鐵鍊家己kah工程車底盤鍊作夥,到hit下晡黃昏暗,周明文͘警方掠去,雙方才離開。但是,台電對李俊諭等十二人提出強制罪告訴,彰化地檢處認為被告抗爭手段理性,全案不起訴。但是台電聲請再議,台中高分檢撤銷原本不起訴處分,檢察官朱健福認定民眾強暴脅迫行為已經妨害台電正當行使權利,依強制罪起訴。 今年一月初七,法官陳義忠判決十二人無罪。因為ùi原告提出的相片來看,看bē出被告有任何「強暴脅迫」。圍車其實是抗爭定定看tio̍h的動作。當時台電已經停工,工作人員kah工程車mā無意向beh繼續施工。被告干單訴求台電bē使家己講beh施工tio̍h施工,無照原本的約束,無論是坐lè、倒lè、徛lè,佇工程車周圍表達訴求,是和平行為,根本m̄是強暴脅迫。法官陳義忠指出,台電有錢koh有勢,大粒奶哄死子,強強beh施工,弱勢者干單會tàng用抗爭迫伊落軟,che是民主國家的常態。若是干單用身軀來訴求無產生明顯隨時的危險,mā受tio̍h言論自由的保障。伊講,親像天安門事件,hō͘全世界大tio̍h驚的,一個手無寸鐵的北京民眾王維林,勇敢擋佇列隊行進的戰車頭前,若是認定王維林是應該受譴責的強制罪犯,駛戰車的人煞變作受害者,按呢kah人權普世價值顚倒反。   縣議員李俊諭講,無罪判決是還伊kah十一名居民一個公道。周明文講,用鐵鍊kā家己鍊tio̍h是beh表示人民的苦難,無罪判決算是還人民一個正義。律師簡翊玹阿老法官陳義忠,是為弱勢kah手無寸鐵的人民做出最後的防護線,言論自由m̄是干單言語kah文字,人民用行動來表展現意志,mā是受言論自由保障的範圍。有一位檢察官講,真歡喜看tio̍h法官用「法律的生命是佇經驗,m̄是佇推理」的態度來審案。因為公共設施施工一定tio̍h考量人民的利益,當人民的生命安全健康受tio̍h質疑的時陣,用非暴力手段和平表達意見,應該知影in主觀上並無犯意。   陳義忠法官chit遍的判決,hō͘真濟對台灣司法失望的人拾轉來一點點仔信心。
 
< Prev   Next >