首頁 arrow 綠色短評 arrow 拒裝退租eTag變作全民運動,讚!

拒裝退租eTag變作全民運動,讚! PDF Print E-mail
Written by 李南衡   
Friday, 17 January 2014
會記得十大建設起造台灣第一條高速公路的時,蔣經國有講因為國家無錢,採取「使用者付費」的原則,歸條公速公路有beh設十一個收費站,等到所收的錢kah起造費用拍平,tio̍h bē koh收費。結果等到所收的錢超過起造的錢,煞講因為beh起造第二條高速公路需要經費,所以tio̍h繼續收費。政府欺負人民,人民kah政府計較。那像馬英九總統所講的,久,人民慣勢tio̍h好。高速公路直直收費那像一隻金鷄母生卵生煞,Ùi 1978年到今仔日生三十六年。橫直蔣經國已經死hiahah,伊在生講的政府mā thiau͘記得。 作囝仔的時去看歌仔戲印象真深的是山賊講的話:「路是我開的,beh ùi我chia過,留下買路錢。」食好鬥相報,Chit遍山賊換「遠通」來作。憑啥物「遠通」會使搶人民的錢?台灣人民真bē爽。政府緊解說講電子收費會hō͘高速公路交通流量加真緊。電子收費是按怎m̄是由政府來做?車主去裝「遠通」的eTag了後,tio̍h koh提錢去辦儲值,「遠通」講你儲值的錢若有夠付通行費,九折優待。全台灣目前大小貨車kah大小客車攏總有七百二十外萬台,準講一半to̍h好,每台儲值五百元,一聲tio̍h有十八億現金hō͘伊收去用。台灣人真m̄甘願。   講eTag全面計程收費偌好對偌好,開始實施無幾工tio̍h問題了了,有車ùi高速公路下腳過mā hō͘扣錢,「遠通」講因機器敏感度足懸。有人kah車攏佇澎湖mā收tio̍h繳費通知單,害hit-ê人想講是看tio̍h鬼。有人早起九點二十分過南下92.8公里佇竹北到新竹的路段,十七分鐘內伊的車北移46.1公里。有兩台車作夥上高速公路koh作夥落高速公路,兩台車所扣的錢無仝款。台灣人真無歡喜。   「遠通」eTag問題一大堆,hō͘人罵kah臭頭。「遠通」董事長徐旭東kā逐個會四擺「失禮」請逐個同情伊、hō͘伊有機會改進。伊koh講,錯誤的比率百分之幾千分之幾錯誤無大。因為最近有人發起退租eTag,伊火上加油講:「退租?退租了beh按怎上高速高路?」小可有恐嚇的意思。伊koh hiat一粒炸彈,「自由世界,你歡喜退tio̍h退」「piáng」一聲,台灣人歸腹肚火做一下夯起來!   馬上有人印「eTag bē爽裝」的貼紙送人貼佇車前。有人隨時報告講無裝eTag照常上高速公路,兩三工後有可能會接tio̍h催繳單叫你去補繳。有人小算一下,假使一工有十萬台次無裝eTag的車輛走高速公路,「遠通」每工tio̍h寄出十萬張的催繳單,明信片一張兩箍半,人工無算十萬張tio̍h二十五萬,若準是一百萬台車次無裝e-Tag,一工tio̍h開兩百五十萬箍的明信片錢,你算看一年tio̍h開偌濟?按呢舞落去,「遠通」無死mā chhun無半條命。   拒裝退租eTag變作全民運動,讚!我m̄信「遠通」偌gâu。
 
< Prev   Next >