首頁 arrow 綠色短評 arrow 司法m̄是the̍h 來凌遲人的!

司法m̄是the̍h 來凌遲人的! PDF 列印 E-mail
發表者 李南衡   
2014/02/07, Friday
一月二五透早五點外,張德正駛沙石仔車ùi Ketagalan大道直直衝入總統府,致使骨折、造成肺部破孔喘氣順,送去台大病院急診。一月二九出院,檢方隨時拘提偵訊了後聲請羈押,台北地方法院認為伊tio̍h傷真重,甚至連家己都無法度翻身、檢方koh無法度證明伊有可能逃亡,裁定無保釋放。檢方不服提出即時抗告。一月三十抗告成功,高等法院發回台北地院重裁。台北地院法官認為張德正重傷,連beh倒落去都需要人鬥相共,不宜羈押,責付三位律師͘張德正過年暗會tàng佇厝裡團圓,裁定釋放張德正。檢方再抗告,高等法院認為張德正有可能偷走再犯,再度發回更裁。一月三十一新正hit工下晡三點,召開第三遍羈押庭。台北地院裁定十五萬交保koh限制住居。檢方第三遍抗告。二月初一,高等法院第三遍發回。台北地院認為張tio̍h傷真重koh無錢,真歹逃亡,改裁三十萬交保koh加限制住居。檢方koh再抗告,希望高等法院會tàng自為裁定。

 

二月初二,高等法院以早前三案攻擊總統府(也就是2003年七月,江高原the̍h「保特瓶」裝汽油kah lài-tà beh佇總統府邊仔的草埔仔點火;仝一年八月,計程車司機薛愛民beh衝入去總統府一號門hông截落來;2006年七月,張漢明佇總統府正門口連續射搫十三發信號彈),被告攏有收押,第四遍發回更裁。台北地院拚歸暝重開羈押庭到初三天光,反駁高等法院的質疑,講每一個案件案情無仝,羈押tio̍h看是m̄是符合羈押要件,並m̄是講以總統府作犯罪對象tio̍h有羈押必要,以三十萬交保、限制住居koh加限制出境、出海,再度裁定交保。檢方不服再抗告。二月初三下晡,高等法院駁回檢方抗告,確定張德正免羈押。高等法院講張德正連續幾工攏準時出庭,伊雖然開車lòng總統府、有造成社會驚惶、殺人未遂等罪,但是無必然需要羈押,看bē出會再犯,駁回檢方抗告。   

 

高等法院最後駁回檢方抗告的理由,mài講第一遍第二遍,至少第三遍tio̍h會使講ah,何必要tī新年頭舊年尾連續五工,kā連家己都無法度翻身的張德正,用救護車載來台北地方法院才換坐輪椅,佇法院等待法官裁定釋放,才koh坐救護車轉去厝裡。來koh去、去koh來,按呢連續五工舞kah hō͘你無死mā chhun無半條命。莫怪連司法院長賴浩敏kah法務部長羅瑩雪都講:「不可思議!」   

 

中國永過有一種刑罸無beh hō͘犯人一聲ti̍ioh死,kā犯人的肉一塊一塊割起來,講是千刀萬割,歸身軀割kah攏無肉ah,犯人猶未斷氣。Hit種無人道的刑罰叫作「凌遲」。高等法院kah檢方聯手搬chit齣拖棚的àu戲,套一句馬英九總統的句法:Che若m̄是凌遲,啥物才叫作凌遲?

最後更新 ( 2014/02/08, Saturday )
 
< 前一個   下一個 >