首頁 arrow 綠色短評 arrow 台灣就是台灣!

台灣就是台灣! PDF 列印 E-mail
2008/09/15, Monday
九月十一新聞報導講,美國國務院通電hou7所有美國駐海外使領館,除了按規定所有美國政府人員be7使出席台灣雙十國慶活動以外,再次強調,美國無承認台灣是一個主權獨立國家,美國官員be7使稱呼台灣作「中華民國」、「中華民國在台灣」,kan-taN會使稱呼台灣是「台灣」。有人驚一跳,其實in每年攏按呢講,並無啥物奇巧e5所在。 Khah值得注意e5是三工前e5九月初八,「台灣人公共事務會」(FAPA)有發一張批hou7 in 所有e5會員,講有一寡FAPA會員可能猶會記得,早期台灣來e5移民teh申請美國護照等文件e5時,出生地hit欄攏hong5被迫寫作「中國」,be7使填寫作「台灣」。Chit-e5無合理e5政策引起台灣同鄉e5不滿,FAPA四界走chong5、路尾尋美國國會支持,而且得tioh8協助修改相關法律。經過幾遍交涉了後,Ui3 1994年開始,所有tui3台灣來e5移民,攏會使佇美國護照、出生證明等相關文件「出生地」欄頂面填寫「台灣」。   FAPA提起,最近陸續有聽tioh8幾件案件,有美國國土官員ka7一寡證件頂面e5「台灣」,大主大意改作「中華人民共和國」。所以FAPA就向美國國務院反映chit-e5問題。美國國務院ka7 FAPA解釋,關於護照頂面出生地e5記載,佇國務院外交事務手冊第七集,附註D,有真清楚e5規定。佇美國國務院e5 網站頂面會tang3查tioh8。美國國務院足清楚向FAPA證實,根據chit-e5規定,所有美國官方文件證明,包括護照、公民證明書、出生證明、結婚證明書、死亡證明等等,申請人攏會使佇出生地hit欄填寫「台灣」。   照chit項規定、亦就是頂面所講e5附註D (6) (f),台灣出世e5人佇chiah-e5文件e5出生地,be7使填寫作「中國,台灣」(Taiwan, Chian)、be7使填寫作「中華民國,台灣」(Taiwan, Republic of China),ma7 be7使填寫作「ROC台灣」(Taiwan, ROC)。假使台灣鄉親e5任何美國文件出生地hong5寫作「中華人民共和國」(People’s Republic of China)、抑是「中華民國」(Republic of China)、抑是「中國」(Chian),請隨時去你當地護照辦公室抑是相關政府部門反映,「要求in遵守美國法律」,馬上ka7你文件e5出生地更正好勢,確保台美人e5權益。   Ui3 chit點咱會tang3看出,美國國務院頭殼比馬英九政府、比中華人民共和國政府、甚至比真濟台灣人e5頭殼攏koh khah清楚。台灣m7是「中華人民共和國」e5一部分,台灣m7是「中華民國」e5一部分,台灣ma7 m7是啥物「中國」e5一部分。道理真簡單,因為:台灣就是台灣!
 
< 前一個   下一個 >