首頁 arrow 綠色短評 arrow 燒嘴phé去ù人的冷尻川!

燒嘴phé去ù人的冷尻川! PDF Print E-mail
Written by 李南衡   
Friday, 14 February 2014
二月十一,行政院大陸事務委員會主委王郁琦去中國訪問,台灣一寡媒體歡喜kah講是台灣主管中國大陸事務官員頭一遍正式上陸,koh講是ùi 1949年六十外年來,雙方兩岸事務主管官員頭一遍正式會面。 台灣chit pêng一直強調雙方是「對等」kah「尊嚴」,王郁琦佇南京祿口國際機場一下落飛機tio̍h破功ah!若是「對等」,來接機的應該是中國國務院台灣事務辦公室主任張志軍才tio̍h,那會落一級派副主任陳元豐去接機咧?若是「對等」,申請隨行採訪的「台灣蘋果日報」kah美國「自由亞洲電台」駐台記者,中國拒絕發hō͘ in採訪簽證,王郁琦那會恬恬無出聲?台灣一寡媒體講王郁琦chit遍上大的任務是為馬英九kah習近平的「馬習會」鋪路,中國一再放風聲講:「目前無馬習會的計劃」。立法院有決議對「王張會」畫一條紅線,要求王郁琦chit遍去bē使kah對岸洽談政治性的議題,但是中國國台辦仝款佇記者會中反對台獨,重申兩岸應該共同為中華經濟來努力,要求台灣盡速完成ECFA後續談判。 中國稱呼王郁琦是「台灣地區大陸委員會負責人」,張志軍有稱呼王郁琦是「主委」á是按怎?中國畫出三條紅線:要求王郁琦bē使講政治、bē使提起中華民國、bē使提起人權民主kah總統,會談中王郁琦乖乖遵守,有影連一遍mā m̄敢講出「中華民國」的名、抑是踏tio̍h其他兩條紅線。二月十二,王郁琦去中山陵祭拜孫中山的時,擔任司儀的陸委會法政處長葉寧,用民國紀元念祭文。祭了,王郁琦佇博愛廣場公開講「中華民國已經一0三年á」,聽起來假那真勇,事實上是m̄敢佇中國官員面頭前講,Che kah古早人講「尻川後罵死皇帝」有啥差別?   二月十二,陸委會主委王郁琦受邀請去南京大學演講,談民主自由,伊講台灣民眾beh看的m̄是干單軍事強權、經濟發展,koh khah希望促進區域和平、邁向富而好禮的公民社會。無疑誤chiah-ê話引起南京大學台灣研究所教授劉相平的不滿,當場唱講:「台灣的民主無一定會適用佇中國」,koh講:「台灣是中國的一部分,應該承擔責任,實現中華大復興。」王郁琦干單回應講伊是分享台灣佇發展過程中所學tio̍h的教訓kah經驗。有關「台灣是中國的一部分」,連哼都m̄敢哼一聲。二月十三去上海訪問智庫「上海社科院」,副院長黃仁偉介紹王郁琦koh講是「台灣地區」陸委會主委,王郁琦解釋講「可能有人講慣勢ah,一時改bē過來。」那像人phùi nōa佇伊的面自然會乾去!   Chit遍陸委會主委王郁琦去中國訪問,無可能有啥物驚人的成就,Hō͘咱看kah會hàiⁿ頭的是:明明是台灣的燒嘴phé去ù中國的冷尻川!
 
< Prev   Next >