首頁 arrow 綠色短評 arrow 中國按呢操縱台北市長選舉!

中國按呢操縱台北市長選舉! PDF Print E-mail
Written by 李南衡   
Friday, 21 February 2014
2012车十一月初三,Hittio̍h有人問連戰的子連勝文是是有意願beh選台北市長,伊應講:「經濟舞無好,就算是當選不過是丐幫幫主。」引起中國國民黨內倒彈,馬英九主席批評按呢講無適當。連勝文回應講伊是講實在話。當時真濟中國國民黨的支持者攏拍phok仔,認為連勝文是中國國民黨的火把,會tàngchhōa in向前行。咱看台灣經濟愈來愈bái,最近連勝文有想beh參選台北市長,按呢是是講丐幫幫主伊無嫌、beh拚命爭取? 舊年2013年九月馬英九發動「滅王計劃」,王金平轉來台灣了後,連勝文拚去拜訪王院長表達支持,而且大聲唱講:「今年是中華民國102年、共和體制,m̄是大明王朝,任何人都bē-tàng嬴過法律。假使王院長有違法,應該透過正當法律程序,是按怎趁人嫁查某子的時去做chit款代誌。」那像正義之聲佇台北發聲!   舊年2013年十一月初十,中國國民黨全國代表大會佇台中舉行,三位市長郝龍斌、朱立倫、胡志強,那像講通和,tī全代會開始一點鐘tio̍h soan了了,明明teh kā馬主席洗面。Koh khah厲害的是中央委員連勝文,看馬英九主席teh beh行到伊面前kah伊握手,伊忽然間一百八十度翻轉身去kah後面的人握手。   連勝文有意beh代表中國國民黨出來選台北市長,那會使無kā in黨有提名權的黨主席看在眼內?所以有媒體人tio̍h先出幾phiat仔小菜hō͘連勝文鼻芳,續落去當然會有一齣一齣大菜伺候伊。連勝文知影beh按怎tháu馬主席的心結,伊tī今年二月初拚去美國參加全美祈禱早餐會,專工提早四十分鐘去等駐美代表金溥聰等無tio̍h,會後才見tio̍h面,握手談話十分鐘。事後連勝文主動發送新聞稿kah相片hō͘記者,表示伊kah馬主席和解,而且主動夯梯beh hō͘馬主席落樓梯。   二月十七,中國佇台灣的總代理連戰,chhōa一陣工商界大粒頭去北京晉見中國國家主席習近平,習主席特別以「家宴」款待連戰,而且強調in的對談是黨對黨的關係,前幾工行政院陸委會王郁琦主委去中國數想拚「平行輸入」的方式,beh kah中國以政府對政府對談,習主席當然無趣味。伊除了宣告連戰總代理的地位以外,特別強調台灣kah中國「仝屬一個國家、仝屬一個民族」的理念。中國反對佇APEC「馬習會」,講hia是國際場合,連戰真有可能暗中建議「馬習會」改佇「博鰲論壇」,算是國內。馬英九tio̍h乖乖提名連勝文代表中國國民黨競選台北市長,來交換習近平主席答應馬英九總統國內事佇國內場合見面。台北市長是日後候選總統的最佳人選,中國那有可能無來操縱咧!
 
< Prev   Next >