首頁 arrow 綠色短評 arrow 敢攏無人應該負責任?

敢攏無人應該負責任? PDF 列印 E-mail
2008/09/23, Tuesday
        中國三鹿毒奶粉事件,佇中國愈舞範圍愈濶,包括「伊利」、「三鹿」、「完達山」中國三大品牌在內e5二十二個品牌,攏總有毒!ma7愈舞愈嚴重,到九月十八為止e5消息,已經有超過六千二百外個病例,其中一百五十八個例有出現急性腰子功能衰竭,死亡個案已經增加到四個,代誌那像猶未煞。

        有夠衰e5是咱台灣e5生理人及消費者。

  台灣海基會接tioh8中國海協會通知三鹿奶粉有毒,咱海基會講這是中國表達e5善意;行政院陸委會講禁止三鹿奶粉koh再進口,就是上嚴厲e5處罰。那像台灣人e5損失無te3討?無想欲討?抑是根本m7敢討?

九月十五新聞報導,台北市衛生局藥物食品管理處長姜郁美表示,追查已經使用三鹿奶粉e5業者,包括中正區一間紅豆奶油餡餅店,坦白承認所買e5包奶粉攏已經用了ah,不過松山區聞明堂六包、偉茂麵包一包、內湖區楓采麵包一包、士林區嘟嘟烘焙坊兩包,流向可疑。

  兩工後e5九月十七,台北市政府衛生局才發表追蹤調查結果,講聞明堂食品公司所使用三鹿奶粉製成e5冷凍麵團並無流入市面。因為聞明堂講,七月十一進用偵詠公司經銷e5七包廿五公斤裝e5三鹿奶粉,陸續作成冷凍麵團儲備使用,ti7八月廿六發現油水分離,隨時ka7猶未開封e5一袋三鹿奶粉,及六袋已經作成e5冷凍麵團,退還經銷商銷毀處理。而且經銷商偵詠公司ma7主動theh8出退貨單證明退貨日期及退貨數量,in有照原價買回。

  問題是,台北市政府衛生局官員猶未查清楚進前烏白講聞明堂六包奶粉「流向可疑」,已經對聞明堂造成足大e5傷害,聞明堂佇in門口貼告示說明ma7無效,無人敢入去買in e5麵包kap其他產品。聞明堂chit種損失應該由啥人負責?

    進口商講,三鹿奶粉我是合法進口、m7是走私e5,我有啥物罪?罵我無應該進口中國產品,現此時馬英九政府敢m7是鼓勵進口中國貨?經銷商講,我向登記有案e5進口商買合法進口e5奶粉,有e5做成麵包買掉去ah,有e5散散賣人,講我無法度交代買主,叫作流向不明,tioh8移送法辦。憑to2一條法律欲ka7我移送法辦?已經ka7毒奶粉做出來e5產品食入去腹肚底e5消費者,問講:啥人欲替阮講話?敢是阮該死?阮囝仔若食了按怎欲尋siang2討?

  中國毒奶粉到底是啥人批准進口商進口e5?進口了後是啥人無檢驗出內底有毒e5?每一關攏應該有人把守e5關口,那會一關過一關攏無看tioh8人?借問一下,咱敢猶有政府?若有,那會無人負責?

 
< 前一個   下一個 >