首頁 arrow 綠色短評 arrow 中華民國到底死幾遍?

中華民國到底死幾遍? PDF 列印 E-mail
發表者 李南衡   
2014/03/03, Monday
二月二二,有beh爭取中國國民黨提名競選連任台中市長的胡志強,佇眷村kah民眾做夥食水餃的時講:民進黨若選tiâu台中市長,台灣會無去、中華民國會無去、兩岸和平發展會無去。意思是講年底chit遍台中市長選舉若͘民進黨提名的林佳龍當選,中華民國tio̍h會死去。͘咱感覺花屑屑的是:中華民國已經死幾遍去ahTio̍h koh死幾遍才會煞?抑是真正已經死誠久ah 照李敖寫的文章,1950年三月十三,蔣介石佇台北「革命實踐研究院」的講演稿、寫佇〈總統復職的使命kah目的〉講:「我今仔日特別提醒逐個,咱中華民國tī舊年年尾tio̍h已經滅亡ah,亡國ah,咱現在已經是亡國之民。」   有朋友去中國旅遊,佇南京中山陵看tio̍h一塊石碑,翕相the̍h 轉來hō͘我看,頂面刻:「中華民國/公元1912年至1949年/建都南京」。Che是中華人民共和國建國以後,專工佇埋葬孫中山先生的中山陵頭前立一個石碑,kā in人民講清楚:前朝名叫作「中華民國」,在生時間是「公元1912年至1949年」,建都佇「南京」。立碑宣布中華民國已經tī 1949年死去ah!非常難得,中國國民黨的總裁蔣介石kah中國共產黨政府無講通套,koh講kah hiah呢對同-中華民國已經tī 1949年死去ah!表示in講的是一個客觀的事實。   1994年台北市長選舉,講是beh建立「新秩序」的新黨提名候選人趙少康,恐嚇台北市民講,若是hō͘民進黨提名的陳水扁當選台北市長,中華民國tio̍h會滅亡。當時佇台北市有謠言teh傳,講假使陳水扁若當選台北市長,會kā台北市的外省人攏趕落去淡水河淹死。真歹勢,1994年台北市長hō͘陳水扁當選去,害中華民國koh死一遍;請問有幾個外省人hông趕落去淡水河淹死去?   2008年,馬英九當選中華民國總統無偌久的十一月初三至初七,中國海協會會長陳雲林來台灣訪問期間,象徵中華人民共和國的五星旗佇台北市內揚揚飛無代誌,卻不准台北市民夯象徵中華民國的青天白日滿地紅的國旗,有人夯中華民國國旗煞hō͘中華民國的警察沒收、旗篙hō͘中華民國的警察遏斷。Hit陣真濟人笑講,馬英九kā中華民國舞死去ah!   台中市長胡志強頂日講chit遍台中市長若hō͘民進黨提名的林佳龍當選,中華民國tio̍h會無去,意思是講中華民國tio̍h會死去!咱佇台北hiah遠,無聽tio̍h台中市民是m̄是有teh喝:「hō͘伊死!hō͘伊死!」逐個票攏tǹg hō͘林佳龍,hō͘中華民國死!事實上,佇台灣借屍還魂的中華民國死了koh死,加死一遍mā無差。
 
< 前一個   下一個 >