首頁 arrow 綠色短評 arrow 活佇雲頂的台灣官員

活佇雲頂的台灣官員 PDF 列印 E-mail
發表者 李南衡   
2014/03/07, Friday
台北市衛生局每年三月初一開始登記老人健康檢查服務,凡若設籍佇台北市年滿六十五歲以上、抑是五十五歲以上的原住民,攏會tàng tī三、四、五chit三個月中,去台北市內包括市立kah私立攏總有三十幾間病院免費接受健康檢查,Che當然是好代誌,咱phok仔阿老。 今年台北市政府衛生局健康管理處增加一項服務,針對特殊族群的老人,包括獨居老人、原住民、低收入戶kah中低收入戶,預留一萬個服務名額,Ùi二月二三到三月初二,特別為chiah-ê特殊族群老人開放電話(有專線號碼)取號kah網路(有網站登記系統網站)取號,The̍h tio̍h登記病院號碼牌,再照規定日期去特約病院預約健康檢查日期kah領取健康檢查注意事項等相關資料,若無照特約病院規定的日期去現場領取資料kah預約日期,算作放棄登記資格。   咱想看覓,佇台北市內,六十五歲以上的獨居老人、低收入戶、中低收入戶kah五十五歲以上的原住民,有電腦會曉上網取號的人,一百個敢有一個?應該是無。In beh那會知影台北市政府衛生局今年有chit款的服務?好佳哉猶有一種電話服務。可惜,獨居老人、低收入戶、中低收入戶kah五十五歲原住民,到底有偌濟人厝裡有電話?按呢chit-ê新服務的功效是m̄是會大大打折? 有誠意、koh khah有人情味的作法是,拜託鄰里長先去探訪獨居老人、低收入戶、中低收入戶kah五十五歲以上的原住民,問in的意願,資料收集齊了後,由里幹事替in拍電話抑是網路取號,然後替in去各病院預約健檢日期kah the̍h相關資料轉來,一個一個交互in。若是身體有無方便的老人,由里幹事陪伴in去病院,按呢台北市民tio̍h會大大感謝台北市政府。   Koh一項,二月二八連續假期的頭一工,台灣鐵路重大電車線故障,造成歷史上上蓋大的車班誤點,影響六萬外名旅客。兼台灣鐵路局局長的交通部次長hông lu出來公開佇媒體面前kâng行禮會失禮。交通部長葉匡時bih佇雲頂,佇伊的面冊 (face book)頂面表示「深感抱歉」,講事件當teh調查,猶無法度判斷啥人應該負責、應該負啥物責。事故原因猶未釐清進前,mài一開始tio̍h想beh處罰啥人。葉部長上愛佇面冊頂面發表高見,活佇雲頂的葉部長想講全台灣所有的人攏kah伊仝款,會曉sńg電腦、歸工teh看面冊。拜託葉部長mài koh bih佇雲頂練仙話,徛出來佇媒體面前kā逐個講清楚會失禮。   Chit大陣活佇雲頂的台灣官員,Tio̍h等待tó一工才會落凡塵,體會一般人的生活,想出一般人會阿老的政策、講出一般人聽會落的話咧!
 
< 前一個   下一個 >