首頁 arrow 綠色短評 arrow 悲哀的中國官方媒體!

悲哀的中國官方媒體! PDF 列印 E-mail
發表者 李南衡   
2014/03/13, Thursday
舊年(2013)十一月二十,美國駐中國大使駱家輝發表辭職聲明,表示伊佇中國兩年半的任期,是一遍「真有成果的極大挑戰。」今年三月初一駱大使kah夫人離開中國。前兩工,中國官方媒體《中國新聞網》發表一篇〈別了,駱氏家輝〉,會使講是代表官方的看法。文章罵駱大使「表面上是久居海外的遊子,黑頭毛黃皮膚的皮袋仔」、罵講chit-ê「瘟神」佇中國兩年半替美國亞太新戰略「演一齣好的雙簧」kah其他的戲齣。罵駱大使是「黃皮白心」kah「芎蕉人屬性」。 2011年八月初一,六十四歲的駱家輝就任美國駐中華人民共和國特命全權大使,Chhōa伊的某子去北京就任的時,有人翕tio̍h伊kah伊的某子飛機坐經濟艙、一家四個人隨人phāiⁿ一個phāiⁿ仔的相片。有真濟中國人阿老駱大使的平民作風,但是有一寡中國官方媒體罵伊是假仙,Thiau故意來kā中國官員洗面,因為中國官員出國坐飛機攏是坐頭等艙。就任了後,駱大使bat穿簡單的便服佇路邊買點心,低調、親民的作風,真濟中國人認為按呢拄拄kah中國官場的貪腐奢華作對照;但是中國官方媒體罵伊是「作秀」。駱大使離開北京去外地開會,無住五星級的豪華飯店、卻去住俗真濟的四星級飯店,真濟中國網友阿老伊勤儉。卻有中國官方媒體講伊省落來的錢歪去、無退還大使館。   2011年十月底十一月初開始,因為北京空氣品質太差,美國大使館有作監測PM2.5的報告,有人佇美國大使館網站the̍h tio̍h資料發表,當時有真濟中國人佇網路頂面對駱大使講「Thank you! PM2.5」。美國大使館發表北京市PM2.5的數據,引起中國官方非常緊張,有的官方媒體講中國kah美國的監測方法無仝,數據當然mā會無仝,有的官方媒體khah離譜,罵駱大使按呢作是干涉中國內政。死鴨仔硬嘴pe無效,2014年一月二四,中國北京市政府乖乖通過《北京市大氣污染防治條例》,明確kā「降低PM2.5濃度」當作大氣污染防治的重點。   2012年四月底,中國盲人人權律師陳光誠佇四位朋友的協助下,閃避重重監視入去美國駐華大使館,六工後的五月初二,駱家輝大使坐車chhōa伊去北京朝陽病院醫病。後來經過中美兩國政府談判,hō͘陳光誠kah伊厝裡的人離開中國去美國。中國官方媒體罵駱大使是「導盲犬」-kā盲人chhiōa路的狗。   駱家輝大使佇離開中國的告別辭按呢講:「我身為華人血統kah幾千年來中國對世界文明所做出巨大的貢獻,我感覺自豪。但是我mā是一個美國人,我為美國hit片自由、希望kah機會的土地,以及美國為全世界所帶來的偉大值值觀感覺自豪。」chiah-ê話應該會hō͘真濟中國人阿老,會hō͘中國官方媒體見笑死!
 
< 前一個   下一個 >