首頁 arrow 綠色短評 arrow 豬仔刣死猶無愛講價!

豬仔刣死猶無愛講價! PDF 列印 E-mail
發表者 李南衡   
2014/03/24, Monday
台灣一句俗語話講:「豬仔刣死才講價。」意思是講:買賣豬仔應該未刣進前,豬仔刣了才講價,飼主當然不利。後來chit句俗語話the̍h來比喻代誌發生了後才來講條件,弱勢hit旁當然會khah克虧,表示佇無平等的情況下談條件。Tī 1997年以前一二十年,香港人會使出聲表達意見,主張獨立抑是繼續作英國的殖民地。佇西班牙南方的「直布羅陀」(Gibraltar)1713 hō͘英國佔領去,最近幾十年來西班牙一直堅持beh收回,2002年三萬人的小所在舉行公民投票,結果是98.97%反對西班牙收回,到今仔日猶原是英國海外的殖民地。香港人等到「回歸」祖國以後才知死,傷慢ah!今仔日想beh用選票來決定家己的領導者都無可能。咱有時會感覺香港人真可憐,「豬仔刣死才講價」ah!咱攏無想看bāi,事實上咱比香港人koh khah悲哀,豬仔刣死猶無愛講價,「海崍兩岸服務貿易協議」(咱簡單叫作「服貿協議」)tio̍hchit-ê死人款! 根據2010年六月二九所簽的(ECFA)第四條,2013年六月二一,兩岸兩會佇上海簽〈服貿協議〉,啥人代表去簽的?bē使講!內容按怎?Tī簽訂進前mā攏無hō͘咱的最高民意機關立法院知影。朝野立法委員攏真受氣,認為對立法院傷過無尊重,若無立法院同意,chit-ê協議無準算。無法度,行政院才kah立法院妥協,2013年六月二五,立法院長王金平召集朝野黨團協商後決定:〈服貿協議〉本文,tio̍h經過立法院一條一條審查、一條一條表決,協議中特定的承諾表mā tio̍h一項一項審查、一項一項表決,若無經過立法院實質審查通過,〈服貿協議〉bē-tàng啟動生效條款。內底有一點上可惡的是:所有的條文攏bē使修改刪加。你講chit-ê政府敢m̄是「豬仔刣死猶無愛講價」?有人罵馬英九總統是戇戇無頭殼,錯了,伊那是戇?是伊心肝底完全無台灣人的生命、安全kah財產。若有,關係tio̍h台灣四0七萬人的頭路kah生活,那會使按呢暗來暗去咧!   佇立法院執政黨立委比在野黨立委人數加真濟,按怎表決你攏無伊法。好佳哉,中國國民黨馬英九主席下令,無管按怎〈服貿協議〉tī chit-ê會期一定愛hō͘過,三月十七才會有中國國民黨立委張慶忠家己佇便所邊唸講宣告開會,〈服貿協議〉審查超過三個月,依法看作已經審查,送院會存查,宣布散會。三月十八暗「烏色島國青年陣線」看bē落去,才會chhōa百外個學生衝入立法院議場,五十點鐘後,提出三個訴求:第一,馬總統tio̍h出面會失禮;第二,退回服貿;第三,本會期通過兩岸協議監督條例立法進前,服貿、貨貿等kah中國談判交流停止。意思是講:價數講了才來刣豬仔猶bē慢。咱kā chi̍h一個「讚!」
 
< 前一個   下一個 >