首頁 arrow 綠色短評 arrow 可愛的台灣人!

可愛的台灣人! PDF 列印 E-mail
發表者 李南衡   
2014/03/28, Friday
三月十七下晡兩點外,中國國民黨立委張慶忠亂舞。三月十八下晡六點外,群眾佇立法院外舉行「守護民主之夜」晚會,有四百外位學生kah群眾衝入去立法院院內,三月十九透早突破警方封鎖線、入去佔領議場靜坐抗議。In比在野的立法委員koh進一步,提出兩大訴求:退回「服貿協議」kah tī本會期立法通過「兩岸協議監督條例」,Tī chit-ê條例猶未通過進前,應停止所有kah中國的協議抑是訂約。一工內,立法院外聚集萬外人,周末上濟人的時段有超過四萬人。 佇chit-ê公民運動中,咱看tio̍h青年學生的智慧、理想、kah行動力,像講佔領立法院議場了後,隨時用一台i pad、一台智慧型手機用十幾種語言向全世界主要媒體第一手現場直播;mā看tio̍h教授學者維護民主法治精神kah學術言論自由的決心,十外位教授學者輪番上課。另外咱看tio̍h koh khah濟可愛的台灣人:   響應學生「反烏箱服貿」,三月十九、二十連續兩工,新北市花店頭家、二九歲的林哲瑋kā一千三百外蕊日頭花送去hō͘立法院外口的學生,日頭花kā學運照kah光映映,Chit遍的學運才有一個響亮的名-日頭花學運;台大社科院配合社會系學生的規劃,kā地下室餐廳闢作休息站,民眾換證件就會tàng入去歇睏,有人提供八十組睏袋,有餐廳每早起送早餐去;有人無出名捐十外萬訂二千個台鐵便當送去立法院,hō͘靜坐抗議的學生kah民眾食一頓燒;包括台大病院在內的十幾位醫生組成醫療救護團入去立法院議場支援;有幾十位律師馬上組成法律顧問團幫助學生解決法律上疑難問題。現場有五百位學生kah群眾成立志工團,分後勤、糾察、醫療、清潔四組,後勤組歸工無閒kā一直送到位的各種物資整理,分類作食物區,保暖衣物區,衛生醫療用品區,文具用品區等等;糾察組維持秩序、koh佇大範圍靜坐區域畫出一條緊急通道,作醫療後送、物資運送、身障人士出入的通道;清潔組負責回收廚餘、清理各種糞埽、分類會tàng回收的資源等等,才囥佇各大腳塑膠袋內底,hō͘立法院四箍圍清清氣氣。   三月二三暗學生攻入佔領行政院,二四透早hō͘鎮暴警察強力驅離的時,有白衣天使kah穿法袍的律師佇現場照顧流血受傷的學生kah群眾;天光了後,電視新聞報導行政院副秘書長蕭家淇罵講伊桌頂的太陽餅phàng見去ah,隨時有人佇台中訂送一百五十外盒太陽餅送去行政院,蕭副秘書長拒收,贈送者拜託快遞公司轉送去hō͘立法院外靜坐的學生群眾作點心。佇美國Miami參賽的台灣網球女將謝淑薇佇伊的面冊po一張伊食太陽餅的相片,說明講:「其實太陽餅是我the̍h去的。」伊真正是咱台灣人的查某子!
 
< 前一個   下一個 >