首頁 arrow 綠色短評 arrow 及中國總理溫家寶談「道德」

及中國總理溫家寶談「道德」 PDF Print E-mail
Friday, 03 October 2008
        面對中國毒奶粉危機,九月廿三,中國總理溫家寶去聯合國前一工,佇紐約參一個歡迎餐會講:中國會ui3嬰幼兒毒奶粉事件「汲取教訓」,作為中國政府負責人感覺十分痛心。伊講:「絕對be7使犧牲人民e5健康及生命來換tioh8企業e5發展。」上要緊是伊講:「一個企業家身上應該流tioh8道德e5血。」九月廿七佇天津舉行e5「世界經濟論壇」開幕式,溫家寶總理講仝款話:「企業家tioh8愛有道德。我希望每一個企業家,佇in e5身上攏流tioh8道德e5血。」

        我m7是道德家,be7曉用三兩句話就ka7「道德」講清楚。不過,以我個人有限e5智識,用一句中國e5成語「民胞物與」來作我個人認定e5道德。「民胞物與」e5意思是:ka7全世界所有e5人攏看作是家己e5同胞,每一個人攏那親像是家己e5兄弟姐妹;ka7世間萬物攏看作及家己仝款要緊。

  西方國家教堂抑是博物館頭前e5廣場,定定有真濟粉鳥佇土腳行來行去,一點仔都無驚人,因為in知影人be7 ka7 in凌遲傷害。有一工一個少年家佇英國一個都市e5廣場,直直jek粉鳥,jek tioh8就用腳踢,英國人看kahbe7慣勢,叫警察來取締。警察tshoa7 hit個人去警察局,叫伊用家己e7錢買第二工第一班飛機機票,遣送轉去伊e5本國。Hit-e5中國留學生可能感覺伊真冤枉,伊m7知英國人e5想法是:會凌遲小動物e5無資格作「人」,英國無愛hou7 tsit種「m7成人」繼續居留。照我講就是hit-e5中國留學生無「民胞物與」e5心。

  若ka7中國總理溫家寶講e5「道德」換作「民胞物與」,就是講中國e5企業家tioh8 ka7全中國、甚至全世界e5嬰幼兒攏看作是家己e5囝仔,ka7所有動植物萬物攏看作及家己仝款,in一定tioh8會「尊重生命」,會尊重生命e5人絕對be5講白賊;若是無注意犯錯,ma7一定會緊改,想盡辦法mai3 koh犯錯。

  中國總理溫家寶要求中國企業家身上應該tioh8流道德e5血。誠好。溫總理一定bat聽過「上樑不正下樑歪」tsit句話。中國政府一直講白賊:「台灣是中國神聖不可分割領土e5一部份」,卻以千四粒飛彈向台灣「同胞」,而且飛彈年年增加。台灣金車、六合化工、汎昇、佳泰食品、三億食品等公司ui3中國都慶公司進口e5原料,所做出來e5產品檢驗攏有毒,中國國務院對台辦發言人講白賊講都慶公司e5原料無毒。中國毒奶粉及其他毒食品濟kah那猫毛,毒害中國大細漢囝仔猶無夠,koh毒害全世界。毒奶粉佇中國ma7已經真濟年ah,那有「汲取教訓」?Tsit種無疼心、愛講白賊e5政府就是無道德。

無道德e5政府,是 behto2一枝嘴要求in e5企業家流道德e5血咧!

 
< Prev   Next >