首頁 arrow 綠色短評 arrow 天色漸漸光!

天色漸漸光! PDF Print E-mail
Written by 李南衡   
Monday, 07 April 2014
三月三十下晡一點到hit暗七點的反服貿大聚會,佇總統府頭前的凱道聚集五十外萬人,Hit工有笑聲有目屎的集會,佇林飛帆宣布散會了後無半點鐘,現場的人散了了,甚至無留落一點仔糞埽,chiah呢有秩序、有公民素養的群眾behtó chhōe Hit暗散場前的甕底曲〈島嶼天光〉拍動在場每一個人的心。「減火器樂團」按呢唱:「親愛的媽媽,請你m̄-thang煩惱我,原諒我行bē開跤,我beh去對抗bē-tàng原諒的人;歹勢lah愛人仔,bē-tàng陪你去看電影,原諒我行bē開跤,我beh去對抗欺負咱的人。天色漸漸光,Chia有一陣為tio̍h守護咱的夢,成作更加勇敢的人。天色漸漸光,已經不再驚惶,現在就是hit一工,換阮作守護的人。已經bē記得是第幾工,請m̄-thang煩惱我,因為阮知影,無行過寒冬(hang-tang),bōe有花開hit一工。天色漸漸光,天色漸漸光,已經是更加勇敢的人;天色漸漸光,咱就大聲來唱tio̍h歌,一直到希望的光線照tio̍h島嶼每一个人;天色漸漸光,咱就大聲來唱tio̍h歌,日頭一下peh上(chiūⁿ)山,就會使轉去lah。天色漸漸光,咱就大聲來唱tio̍h歌,一直到希望的光線照tio̍h島嶼每一个人,天色漸漸光,咱就大聲唱tio̍h歌,日頭一下peh上山,就會使轉去lah,現在就是hit一工,勇敢的台灣人!」有真濟人看手機仔的歌詞kah in作夥唱,唱到「天色漸漸光,咱就大聲來唱tio̍h歌」的時,五十萬人同聲齊唱,hit-ê聲勢實在感動人!   每一個運動上好是有象徵的標誌kah歌曲,Chit-ê運動的頭兩三工有熱心的花店頭家送日頭花來立法院kā學生kah群眾加油,希望用日頭花來照tio̍h烏箱內底的服貿協議,日頭花煞變作chit-ê運動的標誌;感謝減火器樂團主唱楊大正寫出chiah呢會拍動人心的歌詞kah歌曲,感謝滅火器樂團kah阿雞老師的編曲,hō͘ chit首歌m̄-nā成作chit-ê運動的主題曲,mā hō͘逐個一直唱落去,唱到希望的光線照tio̍h島嶼每一个人。   咱真感謝chiah呢濟勇敢koh有智慧的學生kah公民徛出來,若無,He三十秒的鬧局早早就kā烏箱內的服貿協議通過了ah,mā是因為有chiah呢濟勇敢koh有智慧的學生kah公民徛出來,咱才看tio̍h天色漸漸光。總是全體台灣人若無覺醒,台灣的前途會永遠停佇「天色漸漸光」的階段,全體台灣人若無覺醒,日頭永遠無可能peh上山,島嶼永遠無可能天光,希望的光線mā永遠無可能照tio̍h島嶼每一个人。若像三月三十hit暗集會結束的時,五十萬人同聲所喝的,咱tio̍h繼續大聲來喝:台灣加油!
 
< Prev   Next >