首頁 arrow 綠色短評 arrow 濟濟可愛的台灣人講bē了!

濟濟可愛的台灣人講bē了! PDF Print E-mail
Written by 李南衡   
Friday, 11 April 2014
佔領立法院議場kah外圍的學生kah群眾,佇佔領二四工、585點鐘了後四月初十下晡六點照in宣布的時間行出議場,光榮退場。離開進前,議場內底拚kah清清氣氣,出議場後佇濟南路舉行惜別暗會,路尾佇合唱《島嶼天光》的歌聲後散會,Inche是日頭花運動的前言、是結束。逐個tio̍h帶日頭花轉去全台灣各個角落,每一人攏變作日頭,遍照台灣所有的人。足可愛足súi氣! 佇chit-ê日頭花運動中,咱看tio̍h 真濟可愛的台灣人:一位同學拍電話hō͘伊的媽媽哭講:議場我來顧,三月三十,爸爸媽媽拜託恁幫我去凱道,伊的父母答應伊;佔領立法院議場的第三工,一陣教授拚去立法院議場內,kā學生會失禮講:阮來了傷òaⁿ!三月三十hit工,一位一百0五歲的老阿嬤手夯日頭花送伊八十一歲的查某子坐遊覽巴士來台北凱道參加遊行;苗栗kah高雄旗山有花農各送二十萬蕊日頭花來台北支援;全世界有十七個國家的台灣留學生接力thīn三一八學運,Hō͘日頭花佇全世界開花;台南「鳳梨王子」楊宇帆kah伊的老父載五百斤鳳梨來台北立法院送hō͘學生kah群眾食,趁伊無佇厝裡警察去in厝瞭解koh入去伊的房間;有一暗,佇立法院邊仔的7-Eleven架仔頂的食品掃空空,干單有一個廠牌的食品完全無人振動,是《中國時報》、「中天電視」大頭家蔡衍明旗下的旺旺食品;一位小姐第一工衝入去立法院議場了後,伊每工無暝無日佇議場內繪製各種海報,拍電話拜託公司准伊「留職停薪」一個月,公司m̄-nā准伊請假koh送一大堆物資來立法院請伊轉交hō͘日頭花運動物資組,公司的同事聽tio̍h chit-ê消息足感動,逐個捐錢hō͘伊有夠伊一個月的薪水;一位小食店的頭家看電視知影議場內的學生kah群眾逐頓食便當,真m̄甘,拚來立法院外口炒真濟菜蔬真正的「雜菜麵」,一鼎炒了koh一鼎,炒了大聲喝拜託啥人捧入去議場內,總是有志願者趕緊捧入去;食飯時間過了,在場的警察會問學生:「恁的便當那會猶未來咧?」立法院外的警察交換班的時,群眾會徛起來拍pho̍k仔歡送而且大聲喝:「多謝波力士!」有人注意佇立法院外有一個攤仔寫「戰地廚房」,隨時煮食免費供應;有一位賣番薯的單親媽媽連續幾工來立法院外口烘番薯免費hông食;有一位賣八仙果的阿伯捒一台車仔來立法院外口,那切那喚「請來食八仙果!」聽講已經開六萬箍的本錢;台灣基督長老教會雙連教會盲胞組成的「西羅亞詩班」入去議場內獻詩、koh kā學生kah群眾掠龍,kā in加油。   原本有人對台灣失望,佇chit遍日頭花運動中看tio̍h充滿智慧、勇氣kah行動力的學生,以及濟kah講bē了可愛的台灣人,那像有看tio̍h台灣天色漸漸光!
 
< Prev   Next >