首頁 arrow 綠色短評 arrow 馬英九也會假睏也會陷眠!

馬英九也會假睏也會陷眠! PDF 列印 E-mail
發表者 李南衡   
2014/04/25, Friday
咱佇捷運抑是公共汽車內,有少年人坐佇博愛座,Intio̍h老大人、有身的查某人、身軀無方便的人抑是細漢囝仔,會緊徛起來讓in坐。M-kohbattio̍h一個少年人坐佇公車博愛座假睏,公車緊急擋車,歸車的人哀哀叫,有人險險仔跋倒,獨獨hit-ê少年人猶teh假睏、完全無顫悶tio̍h。伊若一下精神目睭peh金,可能會看tio̍h逐個人kā gîn,上好的方法是激͘ phî-phî繼續假睏。 民進黨前主席林義雄先生為tio̍h喚醒馬英九政府停建核四廠,Ùi四月二二早起開始佇台灣基督長老教會義光教會作無期限的禁食。日頭花學運領袖林飛帆二三透早佇伊的面冊頂面po文感慨講:上簡單的訴求,用超脫生死來作的行動,早tio̍h喚醒大多數的台灣人,唯一叫bē醒的是繼續teh假睏的馬政府。無管聚集佇總統府頭前凱道的二五萬白衫軍、無管lòng入去總統府的大卡車、無管佔領立法院議場內外二四工的學生群眾、抑是聚集佇總統府頭前凱道的五十萬人,台灣發生啥物代誌馬英九那像攏m̄知,「一phî天下無難事」有影假睏了誠sêng。 逐遍代誌發生了,馬英九攏會發表「痛定思痛」、「徹底檢討」、「積極改進」、「明快處理」一寡類似chit款的話。有人會懷疑,馬英九teh假睏那會行路講話咧?原來,伊gâu假睏以外猶一項phiat步就是:陷眠。伊若真正睏去,總是會佇睏夢中peh起來行路、講話。問題是伊m̄知影家己teh講啥,別人當然mā聽無。像講,四月十五,身兼中國國民黨主席的馬英九總統,佇中國國民黨立法院黨團大會表示:為維護黨的考紀制度穩定kah黨的運作順利,國民黨照律師團建議對王金平一審判決提出上訴,Che並m̄是針對王金平。未來猶原會kah王金平繼續合作推動政務,絕對bē影響tio̍h國政運作。   林義雄先生teh beh無期限禁食進前有發表談話,伊講:殘害我身軀的,m̄是我家己,是hiah-ê一定beh佇台灣起核四廠的掌權者。伊koh講:馬江等政府高層釋出無核安就無公投的說詞,根本是騙人的把戲。伊講:核電廠的災變kah起好以前有做了核安檢查無關係,三哩島、車諾比kah福島事件,美國、蘇聯kah日本攏是高科技先進國家,In起核電廠一定有經過比台灣嚴格幾若倍的安全檢查,但是若有天災地變抑是人為疏忽,猶原會發生無可能彌補的傷害。所以,今仔日講有核安就會tàng發電,根本是欺騙人的把戲!   Tī林義雄先生禁食的第二工,馬總統專工去探視,留卡片講伊代表政府承諾:核四廠經國內外專家嚴格安檢完成了後,會交由全民公投來決定伊的未來。   假睏中的馬英九那像啥攏m̄知!陷眠中的馬總統敢知影家已teh講啥?
 
< 前一個   下一個 >