首頁 arrow 綠色短評 arrow 官員佇立法院按怎答詢才有算數?

官員佇立法院按怎答詢才有算數? PDF Print E-mail
Friday, 17 October 2008
        十月初七,立法院有一場質詢及答詢。Ui3中國毒粉、口蹄疫講到SARS。前衛生署長、立法委員涂醒哲問國安局長蔡朝明:「頂遍發生SARS e5時,我猶是衛生署長,劉委員特別問我,hem7是生物恐怖?我hite5標準答案是,目前全世界有真濟所在攏teh懷疑,但是咱無證據,不過自了無ka7排除。

請問國安局長已經排除SARS是生物恐怖抑無?」涂立委koh強調問講:「我是講你有ka7排除chit-e5是生物恐怖戰劑流出來e5抑無?」國安局長蔡朝明回答講:「阮ka7伊列作是生化戰劑,而且阮有相當e5證據ma7有請聯合國專家來中國現在某一寡所在」涂立委講:「Tioh8che及阮幾百個接觸e5仝款,坦白講,真濟人攏懷疑,證據無定tioh8 chhoe7 tioh8 ahm7願意放出來,但是逐個攏ka7準作是生物恐怖teh 處理。」

咱佇電視頂面看tioh8 chit段質詢答詢新聞報導,並無看tioh8涂立委趕piang7-piang7ma7無惡chhih-chiih抑是大細聲來質詢、ka7國安局蔡局長嚇驚tioh8,咱看tioh8 e5蔡局長ma7是以真平常e5態度teh答詢、一點仔都看be7出伊有驚惶e5表情,會使講是一場不止平和e5質詢答詢場面。

    無疑誤hit暗國安局就隨時發新聞稿講,蔡朝明佇立法院答詢e5時,絕對無講「SARS是大陸生化戰劑」,是因為答詢時間有限,造成誤解。國安局人士指出,蔡朝明事後有親身向府方說明,講伊佇立法院是hou7立委連番質詢「問了gong5去」,才會雄雄講出前句話,因為be7赴做完整論述,才會hong5斷章取義造成誤解。總統府發言人王郁琦表示,整個事件以國安局e5講法及新聞稿e5內容為準。

  若是國安局及總統府e5講法會通,此後立法委員質詢官員e5時,是m7tioh8愛特別注意下面幾點?第一,Beh質詢官員進前,一定愛先問官員,你今仔日e5狀況好抑bai2?若應講無啥好,就應該請伊先落去歇睏,等待精神狀態好勢才來立法院備詢。第二,質詢了,一定tioh8 koh一遍請問政府官員,你以上答詢e5時間有夠抑無?若無夠,請你繼續答詢hou7清楚。第三,寫一張以上答詢無m7 tioh8,完全以本人佇立法院所作e5答詢為準。無管本人所服務e5單位、抑是行政院、總統府koh作啥物聲明解釋,攏及本人所作e5答詢無關係。等hit位官員簽字了後,才算是答詢完成。若無,be7使hou7伊離開。

  按呢,後遍任何官員佇立法院e5答詢才be5反起反倒,才be7 hou7國家e5主人-咱chiah-e5台灣人民看到霧煞煞。(081010)

 
< Prev   Next >