首頁 arrow 綠色短評 arrow 馬英九用心製作對立仇恨,可惡!

馬英九用心製作對立仇恨,可惡! PDF 列印 E-mail
發表者 李南衡   
2014/05/02, Friday

四月二八,台北市長郝龍斌佇市議會答詢綠營議員的時講:民進黨干單有本事kā民眾帶上街頭,卻無法度理性落幕,抗爭者綁架(páng-kà)市民生活、癱瘓交通,「Che kah劫機有啥無仝?」郝市長有兩點講m̄-tio̍h,第一,現此時的民進黨無本事kā民眾帶上街頭,上街頭的完全是「公民不服從」的表現-無黨派色彩、M̄是為個人利益、非暴力的,有可能違法mā願意擔當責任,是一種為tio̍h「社會良知、正義kah公共利益」所作出不得已的抗爭。第二,用「劫機」作譬喻誠特別mā誠合意,可惜m̄-tio̍h佇主客倒反:有警棍、有濺水車、有鐵網仔、有公權力的鎮暴警察代表馬政府劫機;無願意hông劫機、也就是反核四的民眾倒佇忠孝西路hō͘交通癱瘓,甚至有人chhōa細漢囝仔來,Hō͘細子瞭解父母按呢抗爭是為tio̍h in後一代生命安全。鎮暴警察一下倚近來,In倒佇土腳抑是徛tio̍h雙手夯懸懸、表示無帶任何武器,你講是政府抑是民眾khah sêng劫機的恐怖分子?

阿扁執政八年,大細抗爭無斷,幾十萬人踅街圍城、佔領忠孝西路kah火車頭,你敢有聽講hit陣的政府命令鎮暴警察出去用警棍拍人?頂遍馬政府為tio̍h驅散佔領行政院的反服貿學生群眾,動用水柱濺人、用長短警棍拍人。四月二八透早chit遍佇驅散民眾進前,特別kā佇天橋頂的媒體記者趕落來,甚至有兩位記者受傷、攝影器材lòng歹。為啥物tio̍h趕記者離開上好翕相的天橋頂?因為鎮暴警察開始beh拍人。鎮暴警察阻撓、阻隔、干涉、驅離、暴力對待記者,thún踏記者的新聞採訪權kah人身安全,按呢敢無sêng劫機的恐怖分子?現代的攝影器材kah技術真讚,偏偏有人翕tio̍h四五個鎮暴警察圍起來、用短鐵棍仔出力戳民眾的腹肚,電視播音員koh配合鎮暴警察的動作喝講:一下兩下三下四下五下,攏總戳五下!失禮,警察局長佇議會答詢的時講chit遍警察無帶警棍。

當大批警力kah民眾佇街頭對徛的時,有一位參與反核抗爭的原住民女青年,看tio̍h一位夯盾牌的原住民警察,用原住民的話對hit位警察溫情喝聲:你 敢知影一大堆核廢料囥佇蘭嶼?你敢知影in猶想beh kā核廢料囥佇另外一個排灣族的部落?你敢知影chit-ê政府按呢teh欺負原住民?Chit位原住民女青年那喝那háu,Hit-ê警察恬恬無半句,緊越頭向後壁拭目屎。Hit位原住民女青年寫講,佇心肝底我認為:我知影、我相信,阮的靈魂是徛作夥的。

是啥人kā警察kah民眾舞kah對立?是啥人kā人kah人的情感拆裂?是啥人hō͘民眾煩惱台灣有一工會出賣hō͘中國?是啥人hō͘民眾一直無法度脫離核災恐怖的蔭影?是啥人chiah呢惡毒?馬英九。

最後更新 ( 2014/05/30, Friday )
 
< 前一個   下一個 >