首頁 arrow 綠色短評 arrow 馬英九是啥人?

馬英九是啥人? PDF Print E-mail
Written by 李南衡   
Monday, 12 May 2014
2013年八月十七,馬英九總統去中美洲加勒比海的一個人口只有十萬九千人(無台北市中山區一半的人口)的小國聖文森訪問,伊足歡喜問佇機場歡迎伊的當地小朋友:你敢知影我是啥人?一個一個小朋友攏應講:知。佇中南美洲一個小國的小朋友應該知馬英九是啥人,老實講,知影才是奇怪。 佇台灣逐個攏mā知影馬英是啥人,不過每一個人對伊的認識無相仝,提幾個比較khah經典的講法hō͘逐個參考。   馬英九是「小孬孬」(siâu nau-nau)-2008年三月十六,莊國榮佇台中參加謝長廷kah蘇貞昌的總統選舉造勢活動的時,講:馬英九hō͘我的感覺那親像一個「小孬孬」,一世人可能m̄知啥物叫作guts,m̄知啥物是男子氣概kah魄力。罵了伊隨時主動辭掉教育部主任秘書職位。當時有人阿老伊、mā有人罵伊。一直到今年(2014)三月二七,莊國榮去立法院現場kā學生加油,真濟網友講,早前伊講馬英九是「小孬孬」咱有誤會kā伊罵,今仔日才知影莊國榮是「先知」。   馬英九是戇呆-2012年十一月十六,國際出名的期刊《經濟學人》佇網路刊登一篇關係台灣政治的文章,標題寫講“Ma the bumbler”(戇呆馬),隨時引起網路熱烈討論,結論講馬英九是「無能的戇呆」。Chit箍戇呆去請教教英文的余光中教授,Chit字“bumbler”是啥意思?專門pô͘總統尻川的余光中講:Chit字“bumbler”mā會使解釋作「大智若愚」(Tāi tì jio̍k gū)真正有大智慧的人看起來那像愚戇的人。其實余光中若有良心,應該老實kā講,“bumbler”的意思是大戇的人看起來那像真巧的人,若無,那有hiah濟人選伊作總統?   馬英九是奸鬼的政客-2014年四月二六,前行政院長張俊雄去探視反核四禁食的林義雄先生,伊koh提起伊擔任行政院長hit當時宣布停建核四,結果藍軍以多數國會決議續建。伊批判馬英九是奸鬼的政客。 馬英九是無感情的人-翁某會使講是互相上瞭解的人,無論啥人對馬英九的論斷批評,無一定拄拄誠對同。馬總統夫人周美青對馬英九的看法,應該是一刀tio̍h見tio̍h肉。周美青女士講:馬英九m̄是一個會關心、體貼別人的人。   馬英九是核廢料-到目前為止,真濟解釋馬英九是啥物人的中間,我認為導演柯一正第一名,伊講:馬英九是核廢料,雖然一點仔路用都無,但是對地球對人類猶是有害的。歸年thàng\天每禮拜五下晡六點佇自由廣告舞「反核四五六」行動,伊當然足瞭解「核廢料」是啥,那像伊mā足瞭解馬英九。   你講,馬英九是啥人?
 
< Prev   Next >