首頁 arrow 綠色短評 arrow 美國對台軍售,中國那會反對hiah激烈?

美國對台軍售,中國那會反對hiah激烈? PDF 列印 E-mail
2008/10/17, Friday
        十月十四,中國國防部長梁光烈要求美國取消對台灣六十五億美金e5軍售,伊講賣武器hou7台灣會嚴重損害中美兩國兩軍e5關係。伊e5要求koh一遍表明中國對美國賣大批軍事裝備hou7台灣chit件代誌極度不滿。

        美國賣武器hou7台灣,中國會無歡喜、會受氣,咱攏會tang3瞭解,因為中國一直對家己、對外人攏講,台灣是中國不可分割、神聖領土e5一部分。而且in上愛講e5理由是,根據中美三個聯合公報e5原則,按呢做會嚴重違害中國國家安全、損害中國利益及中美關係。in講中國行e5是和平發展e5路,中國保持有限e5軍事力量,完全是為tioh8捍衛本國主權領土完整及安全,中國e5和平發展be7威脅任何人。

  白賊講到hiah大聲!一千四百粒向台灣e5飛彈是按怎「be7威脅任何人」咧?Chit遍美國賣hou7台灣只不過是愛國者三型飛彈、魚叉飛彈、Apache武裝直升機、預警機、反裝甲飛彈及F-16戰機e5部品而已。恁中國每年大量增加軍備,是為tioh8「捍衛本國主權領土完全及安全」,是按怎台灣be7使買一屑屑仔防衛性e5武器來「捍衛本國主權領土完全及安全」咧?

  十月初三,美國政府通知美國國會,beh賣一批武器hou7台灣,逐個ma7攏知中國一定會反對,無想tioh8會反對hiah激烈。其實中國無應該反應hiah激烈,因為美國驚中國受氣,並無賣hou7台灣teh數想e5潛水艇及F-16C/D戰鬥機。美國政府並無全部通過照台灣提出e5七項軍購,而且刁故意延遲到國會延會期間才通知國會。Koh講台灣chit旁,過去ti7阿扃總統執政八年期間一直佇立法院阻擋軍購預算e5是中國國民黨,Chit遍美國賣武器hou7台灣攏是防衛性e5零星武器,會使講是「意思意思」。

中國反應比以往加足激烈,m7但外交部副部長隨時召見美國駐中國大使館臨時代辦,向美國提出強烈抗議;中國外交部發言人秦剛講,抗議美國賣武器hou7台灣,中國已經決定取消及延遲一寡美中軍事交流計畫,像講原本宣布e5中國對美國e5高層軍事訪問,甚至連人代會都出聲表示反對,有khah反常一絲仔。到底是啥原因?

        照我看,中國明知台灣e5馬英九政府早早就夯雙手koh夯白旗仔,in借題發揮大細聲,m7是向美國ma7 m7是對台灣,完全是teh表演hou7中國國內人民看,beh顯明中國政府是敢向美國唱聲e5大國,佇毒奶粉事件中,放一粒臭屁來安狗心-安中國人民e5心。
 
< 前一個   下一個 >