首頁 arrow 綠色短評 arrow 民主bē-tàng準飯食!

民主bē-tàng準飯食! PDF 列印 E-mail
發表者 李南衡   
2014/05/26, Monday
五月初八,鴻海董事長郭台銘kah phĭn-póng國手莊智淵見面的時,藉機會砲轟日頭花學運,講:「民主bē-tàng準飯食,民主對GDP無任何幫助。我干單beh kā chiah-ê學生講,恁teh白白浪費社會資源,白白浪費社會成本,用民主作無限上綱的指標。」真濟人聽了真tio̍h驚,一位受尊敬的大企業家那會講出chit款話咧?中國國民黨立法委員盧嘉辰替伊解釋講:「因為(郭台銘)伊長期篤信關公,忠孝結義的精神抑是關公顯靈,͘伊靈感的指示͘伊不斷、向前主動關心世局的發展。」政治大學法學院副教授劉宏恩講:「信仰關公mā bē-tàng準飯食。」伊koh講:「社會運動kah民主制度所關心的,是干單有飯食kah GDP的成長,Koh khah關心的是啥人有khah好的飯thang食,若是好額人食肉、散鄉人食粕,是一個民主政治下所希望看tio̍h的。」 世間除了五穀、菜蔬水果、魚肉以外,真少會tàng準飯食的。像講拜關公chit類的宗教信仰,像講人文素養、榮譽、道德、勇氣、關懷、樂觀、自尊、謙遜、慷慨、寛容、自信、正直、溫柔、尊重別人,無一項會tàng準飯食。   食敢有影hiah重要?美國政治家、發明家、作家富蘭克林(Benjamin Franklin) bat講:「人是為tio̍h活來食,並m̄是為tio̍h食來活。」但是有人相信「人是為tio̍h食來活」,而且叫人tio̍h相信按呢。好佳哉koh khah濟人相信「人是為tio̍h活來食。」人活tio̍h beh創啥?為tio̍h beh追求一寡bē-tàng準飯食的價值。   中國作家王朔tī 1988年一年內底,伊的四部小說hông改編拍作電影,1990年伊kah鄭曉龍策劃五十集的電視連續劇《渴望》,創造了中國電視發展史上收視率的最高紀錄。伊編劇的電影《陽光燦爛的日子》得tio̍h 1996年第三十三屆金馬獎最佳劇情片獎。伊bat講過一段話:「信仰bē-tàng準飯食,所以無重要;民主bē-tàng準飯食,所以無重要;自由bē-tàng準飯食,所以無重要;原則bē-tàng準飯食,所以無重要;對中國人來講,bē-tàng準飯食的,攏無重要。咱所信的是豬的生活原則,致使咱歸尾mā kah豬的運命仝款──早慢會hō͘人掠去準飯食。」伊koh講:「講中國人是豬,感情上bē-tàng接受,(起kiāu講)真濟代誌一直檢驗證明中國人是豬chit-ê事實。若mài侵犯tio̍h家己的利益,Tio̍h干單知影頭犂犂拼賺錢,啥人死攏kah家己無關係,但是,一旦傷害tio̍h家己,隨時哀父叫母大聲慘叫。khian一粒包仔hō͘伊,伊隨時恬去!別人teh喝哀的時陣,伊猶原頭犂犂teh食包仔。」   王朔雖然是講中國人,但是,敢m̄是足值得咱台灣人來深思咧!
 
< 前一個   下一個 >