首頁 arrow 綠色短評 arrow 台灣chiah呢媠,無應該有糞埽!

台灣chiah呢媠,無應該有糞埽! PDF 列印 E-mail
發表者 李南衡   
2014/05/30, Friday
頂日新聞報導:有一個外國人開游艇進入台東富岡漁港,看tio̍h港內水面有浮lehleh的糞埽,伊實在看落去,起手去撈(hô͘)水面的糞埽,感動tio̍h一個台東人,Kah伊鬥陣佇hia撈糞埽。而且伊kā chit-ê代誌PO上面冊,超過一萬人按「讚」。Chit-ê台東人佇面冊頂面寫〈Tio̍h是愛台灣〉,有圖有文,伊講五月二十下班了後,去富岡漁港看tio̍h一個外國人teh撈糞埽,兩人tio̍h作夥撈。伊講chit-ê外國人是ùi美國來的,名叫作Chris,已經佇台灣住十四年ah,佇台南作買賣遊艇的生理。伊第一遍來台東,看tio̍h港口hiah呢濟糞埽,真艱苦心,伊講:「台東chiah呢媠的所在,無應該有糞埽!」 二十冬前,我曾寫一篇文罵人烏白擲(tàn)糞埽。講有人kā公共汽車準作糞埽筒,無偌久,我看tio̍h台北市公共汽車頂攏有囥一腳水桶hō͘人擲糞埽,無幾個月後,真有可能水桶底無koh有糞埽,Tio̍h無koh看tio̍h水桶,此後mā真罕得佇公共汽車頂看tio̍h糞埽。無偌久高鐵通車了後,原本我mā真煩惱有人會kā高鐵車廂準作糞埽桶。真佳哉,有可能看tio̍h高鐵車廂hiah呢清氣,手裡的糞埽煞擲bē落去,實在是真好的現象。   二十冬前彼當時我罵講:有人kā公園kah觀光地區準作糞埽桶。當然,Chit幾年公園內kah觀光地區有增設真濟糞埽桶,相信加減有影響。總是我認為chit二十年來台灣人的公德心有普遍提懸。若愈少人鳥白擲糞埽tio̍h會影響到愈濟人m̄敢烏白擲糞埽、甚至無人會烏白擲糞埽。   我真愛去日本觀光旅行,除了交通安全、食物安全、行動安全以外,我上合意的是日本的清氣。去到日本庄腳看tio̍h的大細條溪流,溪水清到會看tio̍h底,佇台灣真難得chhōe tio̍h一條清氣的溪溝。我曾去過日本足濟個港口,我特別注意,每一個港口都攏真清氣,m̄-nā無一點仔糞埽,而且水面清清清,無一個港口親像台灣的任何一個港口的水面浮一重油。   足奇怪的是,真濟超級市場抑是便利商店的門口,若有設方便逐個的公共電話,電話箱頂面tio̍h有人kā準作糞埽桶,烏白囥飲料的罐仔kóng仔;若門口有排自轉車,車手頭前若有掛籃仔,tio̍h有人會kā籃仔準作糞埽桶。那會按呢?   每一個台灣人若攏kah去台東富岡漁港撈糞埽hit-ê美國人Chris仝款的想法:「逐個若mài烏白擲糞埽,tio̍h無糞埽,無糞埽tio̍h無需要人khioh糞埽。」   期待咱每一個台灣人攏會tàng想講:台灣chiah呢媠,無應該有糞埽!有一工無人烏白擲糞埽,Hō͘台灣變作真正的「美麗島」!
 
< 前一個   下一個 >