首頁 arrow 綠色短評 arrow 今年五日節的兩捾肉粽

今年五日節的兩捾肉粽 PDF 列印 E-mail
發表者 李南衡   
2014/06/09, Monday
知是是政府體諒咱老百姓肉粽食起,今年五日節,法務部廉政署特別送咱全體台灣人兩捾肉粽,逐個喝讚!Koh問講那會兩捾niā-niā 台北地檢署偵辦桃園縣副縣長葉世文因為「八德合宜住宅案」涉嫌貪污,依貪瀆、行賄罪,擔心有可能串供滅證,向法院聲請對葉世文、遠雄集團董事長趙藤雄副總魏春雄、蔡仁惠教授四人羈押,五月三十早起法院裁定葉世文、蔡仁惠羈押禁見,趙藤雄、魏春雄各以五百萬kah一百萬交保,台北地檢署不服趙魏兩人交保,隨時向高等法院提起抗告。趙魏兩人離開法院了,隨時轉去公司開主管會議,載六十九箱公司重要資料趕送去桃園機密文件銷燬公司企圖銷毀,hō͘檢察官現場查扣。承辦檢察官認為趙藤雄、魏春雄兩人有串供滅證的可能,有羈押的必要,台北地方法院六月初一半暝重開羈押庭,初二透早裁定羈押禁見。   原本擔任白手套的蔡仁惠願意作「污點證人」,伊指出葉世文佇「林口A7合宜住宅案」mā有the̍h 錢。Chit聲代誌大條ah!He是葉世文擔任內政部營建署長任內的代誌。廉政署追查發現,Chit-ê舊年hō͘內政部表揚作「模範公務員」的營建署長葉世文,Tī署長任內有十四件招標案懷疑有問題。一件一件查落去,m̄知會捾起來偌大捾的肉粽?六月初一,桃園縣長吳志揚一下手刣掉縣政府秘書長、城鄉局長、工務局長、地政局長、政風處長等五粒大官。聽講任何kah葉世文kha̍p會tio̍h的攏tio̍h切割kah離離離。問題是日後,廉政署捾葉世文chit個肉粽頭起來,敢bē巡巡看看鼎底有落幾粒肉粽抑無?   另外一個肉粽頭是趙藤雄,Chit-ê旗下有建設營造、金融、空運物流、遊憩休閒、商務開發等事業身價有十八億美金,佇hông羈押的期間透過律師發表三點聲明以外,講伊m̄-bat講「以後有啥物代誌tio̍h用錢解決。」律師講趙藤雄坦白承認送錢是為tio̍h「解決逐個的困擾」。檢察官批判講,Che tio̍h是隔空串證。Mā有人解讀作,伊teh kā有the̍h伊的錢的大官放調,tio̍h愛想辦法解救伊,若無,「有可能會hō͘逐個困擾」。遠雄標tio̍h的公共建設,除了「林口A7合宜住宅案」、「桃園八德合宜住宅案」以外,猶有「桃園航空貨運園區開發計畫」BOT五十年開發經營權,台北市「大巨蛋案」,國防部委託內政部營建署眷村都更改建工程,有五個所在hō͘遠雄承包去。查看趙藤雄除了送錢hō͘營建署長葉世文以外,猶有啥人the̍h tio̍h錢。kā趙藤雄chit-ê肉粽頭捾起來看māi,看有偌大捾的肉粽。   真感謝廉政署今年五日節送台灣人兩捾肉粽,那像廉政署所講的是鼎蓋拄拄掀開niā-niā。拜託拜託,m̄-thang到路尾,一捾chhun一粒肉粽!歹看。
 
< 前一個   下一個 >