首頁 arrow 綠色短評 arrow 桃園kah台南的教育那會差hiah濟?

桃園kah台南的教育那會差hiah濟? PDF Print E-mail
Written by 李南衡   
Friday, 13 June 2014
六月十一,桃園縣教育產業工會、桃園在地聯盟等民間團體召開記者會,指出桃園縣政府教育局竟然發公文͘各學校,強迫教師航空城計畫編入課程教材內底。桃園縣教育產業工會理事長彭如玉koh講,Chit-ê課程規畫小組的召集人tio̍h是最近涉嫌八德合宜住宅弊案的前副縣長葉世文。彭理事長罵講政治烏手伸入學園,航空城都猶未起飛,Tio̍h beh學生囝仔洗腦。航空城計畫自從審議以來,爭議hiah大、反對聲音無斷,桃園縣政府竟然今年五月初二kah六月初三召開全縣國中、國小教學組長研習會議,要求各校航空城融入課程教材,koh要求列入各校課程計畫,送交縣教育局審閱備查。 上大的問題是chit-ê hông供體(keng-thé)作「空城」的航空城,有啥thang宣揚?莫怪桃園在地聯盟理事長潘忠政會講,用政治手段介入教育,是一種奴化、洗腦教育,會害死囝仔栽、Hō͘學生囝仔想講政治人物所做的攏是tio̍h的。像桃園生態景觀「藻礁」chit種數千年歷史的重要景觀,竟然無beh收入去作教材!   講tio̍h hō͘學生囝仔認識伊所生活的環境,Tio̍h hō͘我想起台南市官田國小的林保良校長,雖然全校攏總才十五班,老師職員鬥鬥起來才三十四位的細間學校。林保良校長的想法是:「在地學生一定tio̍h瞭解在地人的事物。」校長老師總動員編寫學校的課程教材,官田出產的菱角、菱角鳥、八田與一、烏山頭水庫kah鄭成功的參軍陳永華,攏是教材中的主角,林校長chhōa二十二位老師分組進行,低年級以菱角產業為主,中年級用「菱角鳥」水雉作主角,高年級負責八田與一kah烏山頭水庫,特教老師協助鄭成功的參軍陳永華的部分。伊拜託國立台南藝術大學的學生畫插圖,一本一本的圖畫冊預定tī後學期出版。林校長講,各年級老師針對無仝年級的學生設計教材,Koh-khah會tàng符合實際教學的需要。   M̄-nā按呢,四年前官田國小開始透過官田農會四健會的協助,承接學校附近的農地,Ùi培育秧仔、播田、沃肥,到割稻仔的歸個過程,Hō͘學生真實體驗作田的艱苦kah收成的歡喜。收成的米由學生包裝,每包一百箍,Hō͘學生家長kah社區民眾去義賣,舊年賣兩萬一千兩百箍,全部捐hō͘「北台南家扶」作弱勢家庭散鄉囝仔的助學金。今年五月初三,第一節課安排佇校內差不多有四百坪的「幸福農場」上課,學生夯沙挑(soa-thio)挖土,無半點鐘,農場已經種滿高麗菜,萵(oe)仔菜、菜豆、茄仔、菜瓜等菜苗,此後學生tio̍h輪流去沃水照顧,等待收成,會tàng佇營養午餐加菜。老師學生逐個攏真歡喜。Che m̄才是教育!   桃園kah台南的教育那會差hiah濟?
 
< Prev   Next >