首頁 arrow 綠色短評 arrow 千萬m̄-thang插政治!

千萬m̄-thang插政治! PDF 列印 E-mail
發表者 李南衡   
2014/06/23, Monday
六月十四早起,新北市長朱立倫去參加黎明技術學院畢業典禮,伊致詞的時,除了勉勵畢業生tio̍h勇敢面對人生中的tùn-te,佇職場頂面奉獻專業以外,伊特別叮嚀「千萬m̄-thang從政,He m̄是一條好路。」從政的意思是參與政事、做官,用khah清楚的台灣話來講就是「插政治」! 有人講,朱立倫市長做過立法委員、桃園縣長、行政院副院長、現任新北市長,若是做官做了有徹、覺悟「插政治」實在足垃圾,伊已經決意完全脫離政界beh轉去大學教冊,咱應該大聲kā阿老。事實m̄是按呢,今年年底伊有可能拚連任新北市長,mā有人講伊心佇2016年的總統大位。一心一意teh舞政治的人,有啥資格勸少年人「千萬m̄-thang插政治!」有人講,Che hō͘咱想起做囝仔的時,過年過年若有刣雞刣鴨,序大人一定叫囝仔人bē使啃(khè)雞腳鴨腳,講按呢才bē liah破冊。等咱做大人的時才知影,原來啃雞腳鴨腳實在足趣味。   若講朱立倫驚學生囝仔畢業了後,有趣味去「插政治」,kah in專門插政治的一陣人相爭,按呢有小可冤枉朱市長。咱應該理解朱市長是用in中國國民黨插政治的「潛規則」來開破hō͘少年人聽。   朱市長的意思是講:In中國國民黨beh插政治的人,一定tioh家己先秤斤兩。以朱市長來講,In老父bat做過三屆的桃園縣議員kah第二屆國民大會代表,In阿舅bat做過桃園縣大溪鎮長,丈人bat做過台灣省議會議長、立法委員、台南縣長;現任桃園縣長、beh拚升格後桃園市長的吳志揚,In阿公bat做過桃園縣議會議長、桃園縣長,in阿爸bat做過台灣省議會議員、桃園縣長、台北市長、內政部長、中國國民黨秘書長、黨主席;現任台北市長郝龍斌,In阿爸bat做過三軍參謀總長、行政院長;Chit遍beh競選台北市長的連勝文後山上崎,In阿公是戰後中國國民黨政府派來台灣的「接收大員」、Bat做過台灣省政府民政廳長、內政部長;In阿爸bat做過台灣省主席、交通部長、外交部長、行政院長、副總統、中國國民黨主席。朱市長的意思真明:中國國民黨插政治的人,若無問家己阿爸阿公是啥人?千萬m̄-thang插政治,He m̄是一條好路。   美國人權運動者馬丁路德金講:「佇社會轉型期,上大的悲劇m̄是歹人傷hiau-pai,顚倒是好人過頭恬chīⁿ-chīⁿ。」仝款的道理,台灣的政治會舞kah chiah呢烏、chiah呢垃圾,Tio̍h是好人無愛去插政治。咱需要有理想有抱負的青年去插政治,雖然政治m̄是一條好行的路,但是是一條要緊的路。千萬m̄-thang信朱立倫市長的話。想看māi,插眾人的代誌,那會講「He m̄是一條好路」咧!
 
< 前一個   下一個 >