首頁 arrow 綠色短評 arrow 害死囝仔栽的十二年國教!

害死囝仔栽的十二年國教! PDF 列印 E-mail
發表者 李南衡   
2014/06/27, Friday
南美洲流傳一個故事,一架坐滿旅客的客機停佇機棚,講是飛機有故障無法度起飛。一個正駕駛起來摸摸看看、落去;另外一位正駕駛起來摸摸看看、落去;按呢換三四個正駕駛了後,宣布飛機馬上beh起飛。一位旅客好奇問空中小姐:飛機敢修理好á?空中小姐揺頭應講:飛機那有修理?換chit-ê敢駛的。 籌備、爭議二十幾年的十二年國教,相信問題一定足濟。但是che是馬英九競選總統的政見,伊為tio̍h beh留落「歷史功績」,上台了後,迫教育部長tio̍h一定趕緊實施十二年國教。Hō͘伊換掉的鄭瑞城,吳清基兩位教育部長,攏真清楚若是方案kah配套猶無夠周全、一寡問題猶未解決進前,chhóng碰推捒十二年國教一定會出代誌,一直m̄敢硬beh實施。那像南美洲hit隻故障的飛機chhōe tio̍h一個敢駛的正駕駛,馬英九tī 2012年二月chhōe tio̍h蔣偉寧來做教育部長,四月就叫伊一定tio̍h kā十二年國教拚出來。   今年2014年六月真正實施十二年國教,無實施無落氣。十二年國教原本就是接續九年國教,臭彈講是「免費」、「免試」。Chit-má教育部反口供講是實施十二年國民基本教育,m̄是義務教育,所以tio̍h繳學費。有家長抗議,既然叫作「免試」是按怎tio̍h koh來一個「會考」咧?教育部講「會考」m̄是「考試」。敢按呢?教育部重編《國語辭典》解釋「會考」:是一種統一測驗學習成果的考試,舉例「畢業會考」「教師會考」。拜託教育部公開宣布教育部重編的《國語辭典》作廢!若是教育部辯講in無講「會考m̄是考試」,借問,免試是按怎tio̍h koh會考咧?   會考當然是考試,若無,會考成綪那會有ABCD的分數、作文分五級?會考成績beh創啥?Hō͘學生、家長kah老師看爽的、看心酸、看傷心的。M̄-nā會考成績那一陣風,連佇國中三年的成績mā是假的。台南考生陳品銓五科A++(意思是會考滿分),放榜卻無一間學校thang讀;因為「多元學習表現」,tio̍h koh算「競賽成績」、「幹部任期」等項目,koh你填的志願若填m̄-tio̍h一個扣一分(啥物叫作m̄-tio̍h無人知),致使台中一位姓羅的女學生,成績全班第一、畢業得市長獎,會考成績兩個A++、兩個A+、一個A,作文五級的好成績,無想tio̍h填五十個志願全部落榜。to̍h干單填志願填m̄-tio̍h扣分扣了了!che kah教育部臭彈十二年國教「會提升國家人力素質、hō͘社會koh khah公平正義、平衡城鄉差距」有啥關係?   Kā二七萬囝仔栽掠去作白鳥鼠,十二年國教hông罵kah臭頭,教育部長完全無檢討,講伊負完全的責任,taⁿ伊有負啥責任?最後責任當然是硬 tī今年舞十二年國教的中國國民黨馬政府。咱今年年底tio̍h用選票kā教示一下!
 
< 前一個   下一個 >