首頁 arrow 綠色短評 arrow 雞卵掔石牆,你徛佇叼一旁?

雞卵掔石牆,你徛佇叼一旁? PDF Print E-mail
Written by 李南衡   
Monday, 07 July 2014
香港人決定六月二二beh「用愛kah和平佔領中環」活動,提醒香港政府kah中國中央,tio̍h照呼照行2017年香港人真正普選家己的特區首長。三月初六,中共中央政治局常委、全國人大常委會委員長兼中央港澳工作小組長張德江去香港,講「一個立場三個符合」:堅定不移支持香港循序漸進發展民主的立場無變。普選特首tio̍h符合本港實際情況、基本法kah人大常委會的規定;行政長官tio̍h符合愛國愛港標準;使照抄西方hit套,無則水土不服、可能會有災難。香港人無管伊,宣布六月二二開始公投活動。惹起中國中央受氣,六月初十發布「一國兩制白皮書」特別強調:所謂香港高度自治「限度佇中央͘你偌濟權力,香港才會tàng享有偌濟權力。」「一國兩制」的兩制只不過是「從屬」佇一國;特首人選tio̍h符合愛國愛港標準;kah立法會的普選攏tio̍h「符合國家安全kah利益」。 香港人攏知影,六月底的公投一點仔法律上的效力都無,六月二二開始有十五位實體投票所,mā會使用手機仔投票,不過因為電腦受tio̍h國家級「駭客」侵入破壞,致使延期到六月二九。完全無受中國政府恐嚇影響,有七十九萬外人徛出來投票表達in的意願,公投結果是特首的人選有三種:人民提名、政黨提名、提名委員會提名。七月初一香港回歸祖國十七年紀念,有五十一萬人出來遊行、包圍中環、包圍特首辦公大樓,表達in的心聲。名政論家司馬文武寫一篇〈雞蛋撞石牆〉講,香港民意挑戰北京意志,那像雞卵掔石牆。伊koh講,但是啥人敢講北京一定是石牆,香港人不過是雞卵?   1987年一部《挪威的森林》暢銷四百萬本的日本小說家村上春樹(Murakami Haruki),2009年得tio̍h耶路撒冷文學獎,二月伊去以色列領獎。hit當時巴勒斯坦人用身軀抵抗有先進武器、強koh有力的以色列。村上春樹佇領獎致辭上路尾的時講:「一粒雞卵去掔(khian)一堵碇koh厚的石牆的時,我會永遠徛佇雞卵chit旁。」演講了,耶路撒冷市長主動去kah村上春樹握手的時講:Che才是一位小說家的演講!   六月初六,民進黨的台南市長賴清德去上海出席「陳澄波百二誕辰東亞巡迴大展」開幕式。初七去復旦大學演講的時講:民進黨tī 1997年通過「台灣前途決議文」主張台獨,但是台灣前途最後猶原tio̍h尊重台灣全體人民由公民投票來決定。六月十一,中國對台辦發言人范麗青公開宣布,任何牽涉tio̍h中國主權kah領土完整的問題,必須由包括台灣同胞在內的中國人民共同決定。   借問一下,雞卵掔石牆,你徛佇叼一旁?
 
< Prev   Next >