首頁 arrow 綠色短評 arrow 好厲害的金小刀!

好厲害的金小刀! PDF 列印 E-mail
發表者 李南衡   
2014/07/11, Friday
囝仔時代真愛看《西遊記》,上蓋佩服孫悟空猴齊天會七十二變,͘我印象上深的是,猴齊天kah對敵相刣相拍、拍kahbē tiâu的時,伊ùi身軀chhoah幾支毛起來pûn一下,隨時變出幾隻kah伊完全仝款的猴齊天,分一隻是本尊一隻是分身。原本是一對一kah對敵孤對削的局面,pûn一下情勢完全改變,變作五隻十隻猴齊天拍一個對敵,用現代人的用語叫作「逆轉勝」。 稀奇稀奇真稀奇,佇台灣咱看tio̍h一隻現代的「猴齊天」,伊的大名叫作金小刀。金小刀chhoah毛起來pûn一下,隨時變出三個五個金小刀。伊比猴齊天koh khah厲害的是,伊所變出來的金小刀,會使hō͘ in一個一個的分身形像無相仝、名號無仝款,連武功mā有懸低之分。   咱攏知影,金小刀第一個分身名叫作馬英九,武功真強、強kah會tàng拚kah作總統。有一寡戇人猶看無到底啥人是啥人的分身?謝國樑無愛選基隆市長,拚去美國向當時擔任駐美代表的金小刀報告說明;敢大聲罵馬英九「大明王朝」、「丐幫」的連勝文,因為beh選台北市長,mā乖乖拚去美國佇風雪中等beh kah金小刀握一下手。In攏知影佇台灣kā分身講啥都無效。   舊年九月政爭,半暝仔佇總統官邸密商按怎刣王金平,由馬英九主持三人小組,一個是行政院長江宜樺伊才有權刣法務部長曾勇夫,另外一個應該是副總統吳敦義抑是總統府秘書長楊進添才tio̍h,那會叫一個總統府副秘書長羅智強咧?原來伊是金小刀的第二個分身。武功差真濟,hông拍兩個tio̍h走kah無看ê影。 但是猶原會tàng資源回收,三不五時出來放政治雞kui仔看風向,像講chit遍基隆市長選舉,伊跳出來講伊beh選基隆「事長」、主張基隆台北合併。   立法院當teh審查行使監察委員同意權投票的敏感時刻,真濟位中國國民黨籍的立委傳出,有一個自稱代表金溥聰的陳申青,「轉達」金秘書長希望逐個多幫忙,「hông提名的二十九名監委一定tio̍h全部過關」,現時雖然是民視總經理特別助理,聽講伊是金小刀的同學。金小刀的分身tio̍h按呢插入去立法院。   猶有一個金小刀的分身是武功足強的蘇俊賓,會使作行政院新聞局長、行政院南部辦公室負責人,中國國民黨文傳會主委、中國國民黨組發會主委,會tàng飛轉去台南選立委,最近中國國民黨撤銷提名基隆市長候選人黃景泰,隨時有人háng講蘇俊賓beh去選。伊會tàng作政府官員、亦會tàng食黨飯,koh會tàng去chia選去hia選,可見武功當然m̄是小可。   咱m̄知金小刀的分身猶有偌濟身,che正是金小刀厲害的所在!
 
< 前一個   下一個 >