首頁 arrow 綠色短評 arrow 濫糝講話的馬英九有影是咱的總統嗎?

濫糝講話的馬英九有影是咱的總統嗎? PDF 列印 E-mail
發表者 李南衡   
2014/07/18, Friday
馬英九總統愛濫糝講一寡三講四m̄-tio̍h的話。七月十五,「二0一四台灣永續峰會」,主題是台灣的綠能kah經濟。馬總統去致詞,開嘴tio̍h講伊感謝西門子公司第二次世界大戰南京大屠殺的時保護二十萬中國人無hông刣。Koh直直落去,全場的人攏gāng去,互相問講,ta馬英九總統是teh講啥? 七月十三,馬英九總統生日,伊去參加中國國民黨台北市黨部舉辦的各參選人造勢活動,伊致詞一直講伊台北市長任內的政績講bē煞,講伊推動糞埽費隨袋徵收,所以山豬窟糞圾掩埋場猶會使koh使用四十年。全場的人攏gāng去,講啥物山豬窟糞埽掩埋場?三年前就除役,chit-má是山水綠生態公園。   六月二九,馬英九總統出席花東鐵路電氣化通車,致詞的時講伊少年時代有兩遍坐南迴鐵路,一遍是ùi台東、一遍是ùi高雄出發,買的是「臥舖」(咱台語講「寢台」抑是「睏舖」),價錢並無比一般座位khah貴,是第一遍的「台鐵之戀」。Che m̄是陷眠講會出來的話,明明是看tio̍h鬼。因為南迴鐵路是1991年十二月二六才通車,台灣鐵路局的「寢台」tī 1983年八月初十tio̍h廢掉去ah。也就是講有南迴鐵路的時、「寢台」已經廢掉八年外,廢掉「寢台」hit工猶無有南迴鐵路。馬總統m̄是第一遍看tio̍h鬼,舊年(2013)七月十七,阿老文化部長龍應台chit遍去訪問德國誠受歡迎,成作中華民國推廣文化活動上好的代言人。害龍部長笑bē出來,因為伊chit遍去歐洲訪問並無去德國。   四月十四,馬英九總統接見獅子會幹部的時,提起台灣紐西蘭經濟合作協定通過了,鹿茸市場有區隔,對台灣的經濟影響無大。伊恐驚人m̄知啥物是鹿茸,特別說明,「紐西蘭有一種真有名的物件叫作鹿茸,鹿茸就是鹿仔耳孔裡面的毛。」鹿仔耳孔裡面的毛?毛食了到底beh補身軀tó一位咧?若是鹿茸是鹿仔耳孔裡面的毛,借問一下,松茸是啥物動物tó位的毛?   舊年(2013)十一月二六,參加「第三十屆日中工程技術研討會」,馬總統講兩年來台灣不斷加強核電廠的安全kah防護,包括六座機組,當teh起的核四廠增加緊急的抽水pump、移動電源,檔海漲的牆造khah懸,kā福島電廠所遭遇的狀況納入考慮,進行有效的維護。伊講到chia tio̍h好,無代無誌加一句:Mā建立一套機組斷然處置的措施,若危機失控,會使kā歸個電廠「摧毀」(用極大的力量破壞),避免幅射外洩。哇-chiah厲害!歸場的人攏驚kah無人敢喘氣!   雖然咱攏知,馬英九總統的「戇」有得tio̍h國際認定,但是老實講,咱實在m̄知影伊戇kah chit款!會濫糝講話kah chit款!
 
< 前一個   下一個 >