首頁 arrow 綠色短評 arrow 人kah天拚beh創啥?

人kah天拚beh創啥? PDF Print E-mail
Written by 李南衡   
Monday, 28 July 2014
七月二三下晡五點四十,復興航空GE222號班機、ATR72phu-ló-phé-lah客機ùi高雄起飛,佇空中she半點外鐘,七點六分kah塔台連繫,表示降落失敗,要求重飛。無疑誤兩分鐘後失聯,七點十分前後,飛行機落佇澎湖湖西西溪村當teh辦喪事的民宅,旅客kah機員有四十九個人不幸罹難、九個人受傷送醫。 第一時間,逐個當然攏會問講:風颱天chit號型的飛行機敢會使飛?   七月二四透早四點左右,氣象專家李富城佇伊的「面冊」頂面大罵講:「Che是航空公司非常無負責任的代表作,應該kā chit間航空公司關掉!根本就是提人的性命作滾笑。所有的空勤人員攏知影,雷雨區中有潛在的無穩定,也就是有風ùi頂面沖ùi下面洗,有上升氣流kā飛行機phô͘-tháⁿ起去、有下衝風勢kā飛行機的頭chhih kah giâ bē起來,空難往往tio̍h是佇chit種情況之下發生的。天氣chiah呢惡劣,也m̄是長途beh飛轉來的,是按怎無飛chit chōa bē使得?機師kah航空公司攏tio̍h負chit-ê責任!佇離場證頂面簽字的氣象員的責任koh khah大!」   中央氣象局科長謝明昌指出,七月二三下晡四點到六點期間,有一條真明顯的風颱環流kha̍h佇台灣海峽,當時測tio̍h最大陣風九級,一直到hit暗八點,猶有八級最大陣風,每點鐘雨量mā有三十毫米,能見度無到兩公里。Ùi衛星星雲圖kah雷達回波資訊顯示,風颱環流一帶有可能帶來「側風」,也有可能拄tio̍h劇烈的上衝kah下衝氣流,加上「風切」真強,攏有可能造成飛行機起落的風險。   有媒體記者去訪問馬公(má-keng)市的計程車司機,七月二三黃昏暗澎湖的天氣啥款。計程車司機講hit暗有載四個少年人外出,雷公sih-nà pian̄g-phiāng叫,雨khah大風,駛車根本看無頭前,我連車都m̄敢駛,koh有人敢駛發行機?續落去伊煞評論講:氣候chiah bái,飛行機seh兩三lìn無法度降落,tio̍h應該飛轉去高雄,那會使硬硬beh降落?人客若罵作伊罵,是in兜的代誌,安全上要緊。飛行機一下摔落來,有幾十個家庭破碎neh,實在是傷心koh無奈。   世界各國的新聞媒體攏tī第一時間報導chit-ê不幸的空難消息。日本NHK指出,受tio̍h風颱的影響,降落的時視線可能會無夠好。美國CNN提出質疑問講:「是按怎天氣chiah bái猶koh beh飛?」尾仔koh問講:「最後到底是啥人講OK的?」   七月二四,民航局對「路透社」表示,當時的天候有符合降落標準。咱m̄是beh推捒責任hō͘民航局,咱實在無法度理解,那有人無顧tio̍h別人的性命安全,硬beh kah天拚,何mih苦咧?
 
< Prev   Next >