首頁 arrow 綠色短評 arrow 中華民國國旗煞無人愛!

中華民國國旗煞無人愛! PDF 列印 E-mail
2008/10/30, Thursday
        解決南科減振工程成功,無得tioh8勳章顚倒hong5掠去關五十九工,koh hong5起訴,官司纏兩年才ti7今年七月三十判無罪e5前國科會副立委謝清志博士,最近出版由彭琳淞執筆e5《謝清志的生命振動》,讀tioh8目屎會流。親像中央研究院前院長李遠哲博士佇序言所寫e5:「伊hou7咱瞭解tioh8,除非咱e5意志堅強,若無,咱無法度行出黑暗,迎接光明。」

Chit本冊有將近八十頁the講謝清志博士e5生長背景,一個三輪車夫e5囝仔拼到去美國theh8 tioh8航太博士,做航太工作,一九九五年轉來台灣發展太空計畫。佇伊e5主導下,一九九九年一月咱台灣拍第一粒人造衛星「福爾摩沙衛星一號」發射成功,二00四年五月廿一第二粒「福爾摩沙衛星二號」發射成功,二00八年五月,中國四川發生芮氏規模八e5大地動,chit粒福衛二號所翕e5災前災後相片,提供國際做上緊koh上精確e5震災研判。

第三粒「福爾摩沙衛星三號」beh發射進前發生小小插曲。謝清志博士到美西某空軍基地視察發射準備e5時,才知影美方不准咱佇火箭頂面漆國旗。謝博士認為美方欺人太甚,決定beh為台灣爭取應有e5權利,伊放調:若是國旗問題無圓滿解決,停止一切衛星及火箭間碇體介面e5銜接工作,準備延後發射,甚至考慮取消發射計畫。美方chit陣才知影代誌大條,連美國國務院及美國在台協會ma7開始關心。原來是chit遍有及美國政府合作,台美之間因為無正式外交關係,所以be7使漆中華民國國旗。經過幾遍交涉,美方同意佇無國旗e5原則下,做一寡調整,像講漆圖面積會使khah大,頂頭會使用別項代表台灣e5圖案抑是漢、英文字。謝博士為tioh8顧全大局才答應。

謝清志博士感慨e5是:幾十年佇海外,為tioh8挑戰國民黨獨裁無民主,伊拼生死beh ka7 chit面代表國民黨e5中華民國國旗挽落來,結果伊無成功;今仔日beh發射人造衛星,有人beh封殺chit面國旗,伊煞堅持beh ka7國旗漆起lih,結果ma7無成功,這是何等e5諷刺!好佳哉伊有ka7漢字「台灣」及英文字「Taiwan」、「FORMOSA」真巧妙toe7火箭升去太空。

        馬英九政府為tioh8欲迎接中國海協會會長陳雲林來台灣,ka7慶祝「光輝十月」台北市滿街路e5國旗拆了了,引起民進黨台北市議員e5質疑。無想tioh8十月十七《聯合報》e5「冷眼集」批評講:「民進黨,tang時突然愛國旗?」伊那會無問講:「中國國民黨tang時開始無愛國旗?」老實講,民進黨只不過親像謝清志博士hite5心情,hit面啥國旗咱台灣人才無愛咧!(081024)
 
< 前一個   下一個 >