首頁 arrow 綠色短評 arrow 中國國民黨chit遍誠假!

中國國民黨chit遍誠假! PDF Print E-mail
Written by 李南衡   
Tuesday, 05 August 2014
七月二九早起,立法委員行使監察院長、副院長同意權,張博雅干單以一票之差驚險中過關,雖然是歷史上第一低的,但是朝野立委佇喝「無彩」那會͘伊過關去,促成in團結,決定下晡行使監察委員的同意權,刀仔磨͘利利,behtio̍h刣一下khah有咧,果然有三股人馬三個無仝的時間烏名單傳來傳去。開票的結果,馬總統提名的監察員委人選有十一個hôngkah死死giān-giān 中國國民黨的立法委員食tio̍h啥物好膽藥仔,敢正面對沖身兼黨主席的馬英九總統?逐個攏知,中國國民黨的立法委員準有食「熊心豹膽」mā m̄敢chiah呢好膽公然造反。監察委員提名明明是總統馬英九的職權,中國國民黨的立法若無完全配合同意,講是無照馬英九黨主席的意志,無順從黨主席的意志就是違反黨紀!違反黨偌嚴重你敢知?親像陳學聖立委按呢hông停權一年。若chit陣hông停權一年,明年立委選舉提名tio̍h完全無份囉!Khah好運一絲仔,馬英九有可能看伊佇地方有夠力、退黨來選mā會高票當選,放目無kā伊停權一年,心肝kheh-e̍h的馬英九選舉前,伊掖佇立委候選人身軀頂的尪仔標真有可能意思意思niā-niā,選嬴算是中國國民黨提名的立委,選輸拄拄好報伊一個猫鼠仔冤。你講啥人m̄驚黨紀處分?   既然中國國民黨的黨紀chiah呢嚴,那有可能走票咧?原來民進黨、親民黨,台聯黨早早tio̍h嗆聲,投同意權票的時禁止「亮票」kah有人佇邊仔偷監票,若無會kah七月初四行使監察察院長副院長kah監察委員同意權的時陣仝款,霸佔領票處kah tǹg票處,hō͘你koh一遍選bē成。中國國民黨想想一下kah在野黨協調,無beh亮票kah監票。按呢tio̍h無法度知影啥人走票、tio̍h無地處罰人。但是多疑心的中國國民黨高層猶原bē放心,看敢會使假一遍民主莫?tī前一工七月二九,中國國民黨黨團舉行一個「假投票」,確定一致支持所有hông提名的名單。雖然反對派的藍委有提出烏名單三個人,黨中央根本無愛插in。第二工票投出來,才知影昨昏的「假投票」有影是假的,無假免錢。     選了,中國國民黨立法院大黨鞭、政策會執行長林鴻池表示無彩遺憾。有超過三分之一提名的十一個人hông封殺,林鴻池kah黨團書紀長王廷升怪講是民進黨杯葛,特別是監察院長王建煊tī同意權投票前幾工,講一寡監察院的亂象。其實,林鴻池kah王廷升講chiah-ê話mā是講假的!   中國國民黨chit遍誠假,in得tio̍h的教訓是:萬項事攏仝款,假的to̍h是假的,假的bē變作真的!
 
< Prev   Next >