首頁 arrow 綠色短評 arrow 捐錢是做好代,拜託mài比並!

捐錢是做好代,拜託mài比並! PDF 列印 E-mail
發表者 李南衡   
2014/08/08, Friday
七月三十一暗、八月初一透早,高雄市發生驚人的連環汽爆事件,到八月初八為止,知影有三十人不幸死亡,內底有六位咱拍火兄弟殉職,͘人想tio̍h甘;猶有三百二九個人受輕重傷,咱祝福in早日康復;幾條大路炸kah開花,炸出一條一公尺外深的大溝,原本埋佇大路土腳的排水箱涵炸爛去,完全失去排水功能,風颱雨若來看beh按怎tio̍h好?真濟建築物加減有受tio̍h破壞損害。全國人民攏高雄人準作家己的親人,高雄人受苦就是家己受苦,想盡各種辦法beh幫助in。除了有人送各種物資去高雄以外,上實際上方便的方法tio̍h是捐錢。 成十工來,大細間公司行號、機關團體kah個人紛紛解囊救急,mā有藝人作夥表演來募款。其中有一項hō͘人看tio̍h真感動的,是台灣第一趁錢、講是「公車之王」的台北307號公車,為tio̍h beh kā愛心kah關懷傳去hō͘災民,經營台北307號公車的首都客運kah台北客運,決定八月初五全線義駛一工,hit工所有人客刷卡kah投現全部營業收入,攏總beh交hō͘「高雄市政府社會局社會救助金專戶」,統籌救濟災民。消息傳出,有兩位市民去首都客運,講in明仔載無時間去坐307號公車、一個the̍h一千箍表達in一點仔心意;有一位小姐the̍h一大袋銅錢仔去捐hō͘台北307號公車鬥相添。八月初五,台北307號公車義駛hit工,真濟人坐車有加投五十一百。原本一工營業收入差不多百一萬,hit工算算一下有一百四十三萬三千0二十八箍,比平時加出三成。首都客運kah台北客運決定kā總額鬥到兩百萬圓圓,希望高雄災民會tàng感受tio̍h雙北市民kah公車業者的愛心,而且kā滙款單影本公告佇每一台307號公車頂hō͘每一個坐車的人看。   有人批評某人捐偌濟、比並啥人捐偌濟;有人批評某人佇中國四川汶川大地動賑災的時捐偌濟、chit遍才捐偌濟niā-niā;有人批評頂遍日本核災有人捐偌濟、比並chit遍捐偌濟。捐錢原本是做好代,無論捐一箍抑是捐一千萬,攏是捐錢的人的心意,咱攏tio̍h kā阿老說謝!拜託mài按呢比並。頂日有人批評連戰先生chit遍那會無捐錢?有人跳出來解釋,講連先生捐錢一向攏是用「無名氏」。Chit-ê人實在真差,連先生做好代無愛hō͘人知,才用「無名氏」捐,原本是好代誌,chit-ê假gâu的人kā講講出來,按呢對連先生敢好?   捐錢是做好代,捐偌濟攏m̄-thang比並、m̄-thang罵。若beh罵,應該罵hit-ê tī chiah危急、上需要救援的時陣,相對於全國同胞的熱心救援,卻講無beh設專 責機構、無beh訂專法、無beh撥發特別預算,放hō͘高雄市政府kah市民佇hia bo̍k-bo̍k泅、無血無目屎的行政院長江宜樺。
 
< 前一個   下一個 >