首頁 arrow 綠色短評 arrow 中油chit隻金雞母,猶佇高雄放雞屎!

中油chit隻金雞母,猶佇高雄放雞屎! PDF 列印 E-mail
發表者 李南衡   
2014/08/16, Saturday
高雄汽爆大災難後,八月十二,佇「高雄七三一氣爆kah澎湖七二三空難事件全國宗教界追思祈福大會」頂面,罹難的前竹東里長的後生陳冠榮呼籲中油總公司南遷高雄、行政院撥專款͘高雄全面檢測、重建地下管道。 十二下晡,中華民國副總統吳敦義去高雄病院探視氣爆受傷的義消等八名傷患,mā有去罹難的前竹東里長陳進發厝裡致意。伊講中油總公司設佇tó位有公司的考量,無管總公司有遷來高雄抑無,伊過去作高雄市長的時,mā bat爭取中油kā部分營業稅回饋到高雄。中油應該照佇高雄煉油營業額,像講中油佇桃園、苗栗kah高雄各地的煉油廠,準講總營業額是三千億,佇高雄有一千億佔三分之一,tio̍h照比例回饋高雄,按呢才比較khah公道,若無,高雄人攏會講中油「生雞卵無,放雞屎有。」吳敦義koh指出,過去幾十年,營業稅是地方稅,總公司設佇台北、煉油廠起佇高雄,che真無公平。伊講二十幾年前,伊有向中油、經濟部、行政院強力要求才有相當程度的改進,但是猶原是無夠。   聽tio̍h chiah-ê話,咱應該大聲拍pho̍k仔kā吳敦義副總統說謝,感謝伊chiah呢有心,tī高雄大氣爆了後,講出高雄人的心聲、替高雄人抱不平。但是若小靜落來想想一下,那像有tó位怪怪。   第一,吳敦義講伊市長任內有向中油、經濟部、行政院強力要求才有相當程度的改進。到今仔日,中油每年上繳431億營業稅、佇高雄干單繳納房屋稅、地價稅、印花稅鬥鬥起來mā才六億外。借問一下,當年吳敦義ùi 1990年官派作高雄市長、1994年當選第一屆民選高雄市長,前後有九年thang努力,「相當程度的改進」到底是啥?講出來hō͘阮聽看māi。若有相當程度的改進,那會到chit陣中油chit隻金雞母,猶佇高雄「生雞卵無,放雞屎有」咧?   第二,吳敦義當年作高雄市長tio̍h知影向中油、經濟部、行政院強力要求都無啥效。機會來á!hō͘吳敦義好好表現的機會來囉!2009年九月初七,馬英九總統任命伊作行政院長,九月初十,吳敦義就任全台灣最高行政首長,伊作到2011年十二月十六請假參選中華民國副總統為止,擔任行政院長有八百外工,無論tó一工伊若有想tio̍h高雄,伊有權有力thang提出改進方案,m̄-nā會tàng hō͘中油佇高雄生雞卵,而且會tàng hō͘像講中石化、李長榮化工等大細隻幾十隻的金雞母,佇高雄生雞卵。實在真可惜,吳敦義啥物mā無做,一大陣金雞母才會繼續佇高雄「生雞卵無,放雞屎有。」   吳敦義啊吳敦義啊,你那猶有面佇hia講啥物五四三咧!
 
< 前一個   下一個 >