首頁 arrow 綠色短評 arrow 真正是烏白來的張顯耀案!

真正是烏白來的張顯耀案! PDF 列印 E-mail
發表者 李南衡   
2014/08/29, Friday
陸委會副主委張顯耀是總統的特任官,馬總統拍電話͘伊勉勵兩句,講伊階段性任務已經達成。張顯耀有偌濟的委曲、有偌大的甘願,mā- tio̍h鼻仔摸一下,包袱仔款款離職。那會舞kah chiah亂是因為馬英九「不沾鍋」性格。 八月十四,陸委會主委王郁琦kā張顯耀講頂頭請伊辭職,有安排一個國營公司董事長beh hō͘伊,請辭的理由是「家庭因素」,張顯耀若恬恬無出聲,「聽話董事長」,tio̍h bē有後壁的發展「不聽話共產黨」的戲齣。八月十七,張顯耀講伊是hông請辭職的,陸委會hit暗隨時講張顯耀佇工作上「有疑點」,才叫伊離職接受調查。八月十八,張顯耀講陸委會烏白亂射箭,害伊冤枉無地講。八月十九,陸委會決定kā全案送調查局。八月二十,陸委會王郁琦主委講七月下旬有接tio̍h情資,知影張顯耀涉嫌洩漏國家機密。八月二一,《聯合報》頭版講調查局懷疑張顯耀已經hông吸收作共諜。八月十九,張顯耀接受電視專訪的時講,今仔日伊有感覺hō͘長官出賣、koh親像hō͘烏道teh追殺的叛徒。   烏道先開條件,你若無beh接受tio̍h追殺到底。追殺的理由那像北宜公路九彎十八斡驚險變化,先講張顯耀經常kah綠營的立委拍牌,續落講張顯耀佇張志軍來台灣參訪的時有涉嫌圖利某企業;koh放聲講張顯耀涉安的情節會「舉國震驚」,那像無啥人驚tio̍h;續落講「馬習會」會破局,完全是張顯耀洩密。   八月二一下晡,張顯耀開記者會講,che是二一世紀的「白色恐怖」!咱知,ùi 1949年五月十九發佈戒嚴令,仝年五月二四通過《懲治叛亂條例》kah《動員勘亂時期檢肅匪諜條例》開始白色恐怖,各情治機關掠「共匪」、「匪諜」「匪諜嫌疑犯」以及「知情不報者」,根據法務部的報告,當時軍事法庭受理的政治案件有兩萬九千四百0七件,無辜被害者有十四萬人。事實上,根據司法院透露,政治案件約有六七萬件,每案平均三個人計算,應該有二十萬人以上。有的銃殺、有的刑kah死去、有的關kah破病死去,死無去的有判無期徒刑、二十年十五年十年的。一直到1987年七月十五解嚴為止有三十八年久的白色恐怖。事實上是一直到1991年廢除《懲治叛亂條例》kah 1992年《中華民國刑法》第一百條的修正,終結言論叛亂罪的法律依據,台灣才真正結束白色恐怖。   Chit十外工,一直有人佇報紙放聲講張顯耀是「共諜」,有人講伊是中台美的三面間諜,調查局甚至kā張顯耀案送去高檢署的罪名是「外患罪」,莫怪張顯耀會大聲喝講che是二一世紀的「白色恐怖」。   「烏」道追殺加「白」色恐怖,按呢m̄是「烏白來」,啥物才叫作「烏白來」?
 
< 前一個   下一個 >